Sebastian Vettel e kalonte finishin i pari dy javë të shkuara në Melburn, duke lënë pas Lewis Hamilton-in. Sot ngjet e kundërta në Shangai, ku fiton Hamilton e del i dyti Vettel.
Gara e dytë sezonale e Formulës 1, ajo e Çmimit të Madh të Kinës, u kushtëzua nga terreni i lagësht në nisje, që solli ndryshim të strategjive të vendosjes së gomave; hyrja e makinës së sigurisë në pistë në xhirot e para qe një tjetër faktor që përcaktoi atë çka do ndodhte më tej.
Futja e Red Bull-it në lojë e bëri më të ndërlikuar situatën, çka u pasqyrua dhe në mbarim të garës.
I vetmi që nuk ndryshoi pozicion që në nisje, përjashtuar disa momente gjatë ndërrrimit të gomave, ishte Lewis Hamilton, i cili e nisi garën i pari dhe e përfundoi po i pari.
Vettel do të vuante qëndrimin pas Raikkonen-it dhe Ricciardo-s, por në fund do të ngjitej në podium i dyti.
Monotoninë e pjesës së fundit të garës do ta prishte rivaliteti për vendin e tretë mes Verstappen-it dhe Ricciardo-s, dy pilotëve të Red Bull-it, qğ pati fitues holandezin.
Në fund, vlen për t’u përmendur paraqitja sërish zhgënjyese e McLaren-it, dy pilotët e së cilit u detyruan të tërhiqen.
Pas Hamilton-it, Vettel-it e Verstappen-it, dhjetëshen e parë e plotësuan Ricciardo, Raikkonen, Bottas, Sainz, Magnussen, Perez dhe Ocon.
Vettel dhe Hamilton e kryesojnë kampionatin e saponisur me nga 43 pikë, me nga një fitore e nga një vend të dytë. /tesheshi.com/
