Hamasi tha se deklarata e presidentit amerikan Joe Biden se Hamasi nuk dëshiron një marrëveshje armëpushimi në Rripin e Gazës është “mashtruese”.
Biden, duke iu përgjigjur pyetjeve në lidhje me negociatat e armëpushimit, tha: “Izraeli thotë se ata mund ta zgjidhin atë, ata janë gati. Por mua më është thënë se tani Hamasi po tërhiqet”.
Duke hipur në aeroplan pasi mbajti një fjalim në Konventën Kombëtare Demokratike në Çikago të hënën, ai shtoi: “Do të shohim. Do të vazhdojmë presionin.”
Hamasi tha se fjalët e Biden nuk pasqyrojnë pozicionin e tyre të vërtetë, që është se ata duan të arrijnë një ndërprerje të armiqësive.
“Propozimi që na u paraqit së fundmi nuk përputhet me atë që palët ranë dakord më 2 korrik. Konsiderohet si përgjigja dhe pëlqimi amerikan ndaj kushteve të reja të terroristit Netanyahu dhe planeve të tij kriminale për Rripin e Gazës”, shtoi Hamasi.
Sekretari amerikan i shtetit Antony Blinken, i cili është në vizitën e tij të nëntë në rajon që nga fillimi i luftës, u shpreh optimist pas takimit me zyrtarët izraelitë të hënën. Ai vizitoi Kajron të martën, përpara bisedimeve të planifikuara për të enjten. Çështjet kryesore të diskutueshme mbeten të pazgjidhura.
SHBA ka paraqitur propozime kompromisi që, së bashku me Katarin dhe Egjiptin, beson se mund të lidhin mosmarrëveshjet midis Izraelit dhe Hamasit dhe t’i japin fund konfliktit që po destabilizon të gjithë rajonin.
