Ardjani nga Sauku, as që e di se ç`është Hallouini e as që i interesin. Ai vjen për çdo fundtetori në ish-bllok për të shitur kungujt që blejnë hallouinsat….
Nga Bardha Nergjoni
Hallouni, një festë e marrë që ka gjetur vend dhe ndër shqiptarë vitet e fundit, është kthyer në një burim fitimi për shumë biznese, përfshirë dhe atë të kungullit.
Ardjan Garunja nga Sauku, i cili gjatë vitit shet fruta e zarzavate, këto ditë po merret vetëm me kungullin e destinuar për Hellouinin.
Ai i ka mbledhur ngado kungujt dhe i ka prerë siç dhe e ka mësuar se duhen për këtë lloj festë që ua ka marrë mendjen sidomos të rinjve.
Pikërisht pranë zonës “trend” të ish-bllokut, në një nga rrugët më të populluara ai ka vendosur kungujt me radhë duke i vënë edhe çmimin sipas madhësive. Por veç funksionit për Hallouinin, kungujt e Ardjanit edhe mund të konsumohen e nuk janë thjesht për vitrinë. Tregtimin e kungujve për 31 tetorin, ai e ka filluar qysh në vitet 2000 kur shitjet ishin shumë të pakta. Tani shet deri në 30 kunguj në ditë.
“Si çdo vit 4 apo 5 ditë para Hallouinit vendi im është këtu pranë bllokut të Tiranës për të tregtuar kunguj. Vetë jam nga Sauku, por kam tregtuar gjithmonë në Tiranë. Gjatë vitit shes fruta e zarzavate. Të gjithë më njohin mirë dhe e dinë që kunguj do të gjejnë vetëm nga unë. I grumbulloj nga të gjitha trevat, madje edhe nga Kosova e Maqedonia. Siç e shikoni janë të madhësive dhe të llojeve të ndryshme por të gjitha mund të hahen. Klientët që blejnë kunguj mund ti përdorin për <em>Hallouinin</em> e më pas edhe mund ti konsumojnë, pasi kungulli mund të përdoret shumë mirë në guzhinën shqiptare”.
Ardjani nuk është shumë i kënaqur me shitjet këtë vit dhe këtë e quan efekt të krizës. “Kam shitur edhe më shumë. Blerjet kanë rënë dhe tani me vështirësi mund të shesh 20 apo 30 kunguj. Çmimet variojnë, nga 5 00 lekë, në 1500 lekë për një copë, varet nga madhësia”.
Ai është tregtar dhe si i tillë ka zgjedhur vendin, i është përshtatur formës së prerjes së kungujve dhe i ekspozon sa më mirë që të gjithë të ndalen e të kenë një kungull të tillë në shtëpi. “Vendin e kam zgjedhur se më ka pëlqyer. Këtu jemi në zemër të Tiranës. Çdo vit jam këtu në të njëjtin vend dhe në të njëjtat ditë”.
Pyetjes se kush blen më shumë kunguj, ai i përgjigjet pa hezituar se janë kryesisht të rinj por edhe lokale. “Sivjet kam vënë re se ka edhe shumë gjyshër që i blejnë për nipërit e tyre. Kanë filluar edhe të moshuarit ta kuptojnë se çfarë është Halluini(qesh)”. Por vështirë se Ardjani vetë e di se çfarë është Hallouini. Ai shprehet se ka mësuar se kungujt janë simbol, se duhen prerë me të tilla forma, por se çfarë simbolizon kjo festë as që ka dëshirë ta mësojë, e rëndësishme është që të bëjë para duke shitur kungujt e prerë me forma të ndryshme që do të thotë më shumë të ardhura për familjen në këtë kohë të vështirë krize.
Pas 31 tetorit, Ardjani do të kthehet tek fruta-perimet. /tesheshi.com/
