Halli gjerman: mes fluksit të papërballueshëm të azilantëve dhe njollës ksenofobe të së kaluarës

Sulmet mbi qendrat e strehimit të azilkërkuesve në Gjermani janë rritur në mënyrë domethënëse, 173 sulme deri tani gjatë këtij viti, ndërsa gjithë vitin e kaluar u regjistruan 175 të tilla.

Ndërkohë, lëvizja kundër emigrantëve, Pegida mbledh njerëz në tubimet e veta jo vetëm ata të së djathtës ekstreme, por edhe njerëz që thjesht janë kundër emigracionit pasi i druhen ndikimit në jetën e tyre.

Sulmet dhe protestat, thonë analistët, tmerrojnë pjesën më të madhe të gjermanëve. Shumë njerëz në Gjermani besojnë se është detyrë e një vendi të pasur të ndihmojë refugjatët.

Të tjerë e shohin emigracionin si një zgjidhje të mundshme për plakjen e popullsisë dhe mungesave në tregun e punës.

Por, mbi të gjitha, në një vend ku e kaluara qëndron ende si njollë e së tashmes, cdo manifestim i ndjenjave raciste evokon shqetësim të thellë.

Revista Spiegel nxori në faqen e saj të parë një foto refugjatësh të shoqëruar me titullin: “Urrejtja për azilkërkuesit po e helmon Gjermaninë”.

Kështu ekziston një atmosferë e brishtë ndërsa politikanët kanë ngecur në diskutimet e tyre sesi ta përballojnë problemin.

Debati që zjen prej muajsh tenton të përqëndrohet rreth dy pyetjeve: Kush duhet të paguajë për fluksin e refugjatëve në Gjermani? A ka ndonjë mënyrë për të reduktuar numrin e tyre?

Qeveria federale së fundmi ra dakord të miratojë 1 milion euro për të ndihmuar shtetet gjermane të përballen me faturën e azilkërkuesve që po rritet me shpejtësi.

Kjo nuk është e mjaftueshme, të paktën për kryeministrin e Bavarisë.

Horst Seehofer, i cili drejton gjithashtu edhe partinë aleate të Merkel në koalicionin qeveritar CSU, është ideator i planeve kontroverse për të reduktuar numrin e azilkërkuesve nga Shqipëria, Kosova dhe Mali i Zi.

Propozimet e tij do të zgjasnin strategjinë që Qeveria federale zbatoi vitin e kaluar.

Në dhjetor, Berlini deklaroi Serbinë, Bosnje-Hercegovinën dhe Maqedoninë “vende të sigurta origjine”, duke e bërë shumë më të lehtë dhe më të shpejtë për shtetin refuzimin e kërkesave për azil nga këto vende.

Në Bavari, planifikojnë kampe të ndara dhe kontroverse për këta azilantë.

Ideja “funksionoi” në atë që numri i azilkërkuesve nga këto vende u rrit me 12 për qind, ndërkohë që numri i azilkërkuesve nga Shqipëria, Kosova dhe Mali i Zi u rrit me 500 për qind.

Në fakt, këtë vit 34 mijë refugjatë mbërritën në Gjermani nga Siria dhe 31 mijë nga Kosova.

Nuk është surprizë përse shumë politikanë janë në favor të deklarimit të dy vendeve ballkanike, Shqipërisë dhe Kosovës si vende “të sigurta”.

Përgatiti: Juli Prifti –  /tesheshi.com/