Forcat turke në Siri synuan 115 dhe shkatërruan 101 objekte në përgjigje të një sulmi të forcave të qeverisë siriane ku u vranë pesë ushtarë turq, tha Ministria e Mbrojtjes Turke.
Ministria ka treguar se do të vazhdojë t’u përgjigjet sulmeve mbi trupat e saj, të cilat kanë poste vëzhgimi në veri-perëndim të Sirisë.
“Tre tanke, dy pozicione mortajash u shkatërruan dhe një helikopter u godit”, thuhet në deklaratë.
Më parë, ministria turke tha që pesë ushtarë turq ishin vrarë dhe pesë ishin plagosur në granatime intensive nga forcat e qeverisë siriane në provincën veriore siriane të Idlibit.
Zyrtarët turq i kanë thënë një delegacioni rus se sulmet ndaj posteve të vëzhgimit turk në veriperëndim të Sirisë duhet të pushojnë menjëherë, duke theksuar se sulme të tilla nuk do të shkojnë pa përgjigje.
Këshilltari presidencial Ibrahim Kalin tha që delegacionit rus i ishte thënë se sulmet ndaj forcave turke ishin të papranueshme dhe se Moska duhet të përmbushë detyrimet e saj në bazë të marrëveshjes së de-përshkallëzimit midis Moskës dhe Ankarasë në vitin 2018, raporton Reuters.
Sulmi erdhi në një kohë kur një delegacion rus mbërriti në kryeqytetin turk për një raund të dytë bisedimesh për rritjen e tensioneve në Idlib, fortesa e fundit e rebelëve në Sirinë fqinje.
Javën e kaluar, tetë pjesëtarë të personelit ushtarak dhe civil turk dhe 13 ushtarë sirianë u vranë në një shkëmbim zjarri në Idlib. /tesheshi.com/
