Taras. D. është një ukrainas që ka punuar në jahtin “Lady Anastasia” për 10 vjet si mekanik. Pas lajmit për sulmin në Ukrainë, ai vendosi të fundoste mjetin e shefit të tij rus.
Taras, D. 55 vjeç, planifikoi të fundoste një jaht me vlerë gjashtë milionë euro në Port Adrian në Mallorca, raporton Mirror. Ai vendosi këtë pasi pa rusët duke bombarduar Kievin në lajme.
Pronari i jahtit dhe shefi i tij, Alexander Mikheyev, ka një pozicion të lartë në kompaninë shtetërore ruse të specializuar në armë. Kaq mjaftoi që ukrainasi të vendoste ta dërgonte anijen në fund të detit, por në qëllimin e tij ai dështoi.
“Nuk pendohem për asgjë dhe do të provoja sërish”, tha ukrainasi pas lirimit të tij.
Taras ka punuar si mekanik në anijen “Lady Anastasia” për rreth 10 vjet dhe shpjegoi për mediat lokale se përpjekja për t’u fundosur ishte një “akt hakmarrjeje” ndaj pronarit të anijes.
“Shefi im është një kriminel që shet armë që vrasin popullin ukrainas,” tha ai.
Taras thotë se pa lajmet e luftës dhe pa një sulm me raketa në një ndërtesë në Kiev. Dhe, raketat ishin nga ato të prodhuara nga firma e shefit.
Dy orë më vonë ai u kthye në anije me një plan për ta dëmtuar atë. Ai llogariti gjithashtu mbylljen e valvulave të karburantit për të parandaluar ndotjen. Ukrainasi hapi një valvul të madhe në dhomën e bojlerit dhe një tjetër në dhomën ku jeton ekuipazhi.
Ai u tha anëtarëve të ekuipazhit të largoheshin nga anija, por ata vendosën të qëndronin dhe vazhduan të punonin për të parandaluar fundosjen e anijes.
Në ndihmë të tyre erdhën edhe punëtorë nga porti, dhe anija dyshohet se është fundosur pjesërisht. Me mbërritjen e policisë, ukrainasi ka pranuar menjëherë fajin dhe ndërkohë është lënë i lirë, por ende nuk dihet nëse do të akuzohet. /tesheshi.com/
