Rusia po përgatit sanksione ekonomike në shkallë të gjerë ndaj Turqisë si kundërpërgjigje ndaj rrëzimit të një avioni të saj ushtarak në kufirin mes Turqisë dhe Sirisë. Kryeministri rus, Dmitry Medvedev tha se masat do të hidhen në letër brenda disa ditësh dhe mund të godasin edhe planet e përbashkëta të investimeve.
Turqia refuzoi të kërkonte ndjesë për rrëzimin e avionit rus, një kërkesë e Moskës kjo, duke argumentuar se avioni luftarak kishte shkelur hapësirën e saj ajrore. Tensioni midis Turqisë dhe Rusisë, që mbështesin palët e kundërta në konfliktin sirian, është shtuar ndjeshëm pas incidentit. Kjo përballje shtoi druajtjen e një përplasjeje që solli edhe apelin e Shteteve të Bashkuara, Bashkimit Europian dhe Kombeve të Bashkuara për vetëpërmbajtje.
Duke folur në mbledhjen e qeverisë, transmetuar direkt në televizon, Medvedev tha se qeveria është urdhëruar të hartojë një sistem masash në kundërpërgjigje ndaj aktit të agresionit, siç e cilësoi rrëzimin e avionit, e këto masa përfshijnë sferën ekonomike dhe atë humanitare.
Ai tha se fokusi do të jetë në ndalesat e kufizimet në interesat ekonomike të Turqisë në Rusi dhe limitim të furnizimeve me produkte, përfshirë edhe ushqimet.
Turizmi, tregtia, punësimi dhe doganat do të preken nga masat sikundër edhe kontaktet njerëzore. Masa të njëjta mund të prekin edhe projektet e investimeve, ku sipas Medvedev, “bashkëpunimi me Turqinë ka qenë i përcaktuar në një nivel të lartë nga besimi tek ai vend”.
Dy vendet kanë lidhje të rëndësishme ekonomike. Rusia është partnerja e dytë më e madhe tregtare e Turqisë, ndërsa kjo e fundit është destinacioni më i madh për turistët rusë.
Por, pas një dite me deklarata të moderuara nga palët, pas rrëzimit të avionit rus nga Turqia, ku u fol për vetëpërmbajtje e qetësi e ku Rusia tha se nuk kërkonte luftë me turqit, Moska duket se nuk e ka përmbajtur hakmarrjen. Sanksionet ekonomike kanë rikthyer tensionin mes dy shteteve, shoqëruar edhe me incidente.
Sipas CNN turk, rreth 50 sipërmarrës turq janë ndaluar nga autoritetet ruse në Krasnodar, me akuzën se kanë gënjyer lidhur me arsyen e hyrjes së tyre në Rusi. Një nga biznesmenët ka treguar se grupi i sipërmarrësve është ndaluar që dje, e më pas ka dalë përpara gjykatës, ku ata janë dënuar me dhjetë ditë mbajtje në burg dhe me një gjobë prej 4 mijë rublash, apo më pak se 60 euro.
Akuza e ka marrë këtë vendim, duke sqaruar se sipërmarrësit turq kishin deklaruar se kishin hyrë në Rusi për turizëm, e jo për të marrë pjesë në një panair bujqësor si kishin bërë në të vërtetë.
Përgatiti:Juli Prifti- /tesheshi.com/
