Pas akuzave të vazhdueshme dhe kërkesave për shkarkim të Ilir Metës për ministrin e Brendshëm, Sajmir Tahiri, ky i fundit, me anë të disa dokumenteve të publikuara në media akuzon kompaninë sigurisë së aeroportit, e cila është në bashkëpronësinë e vëllait të ish-ministrit të Drejtësisë, Nasip Naço.
Siç bën të ditur Top Channel, Autoriteti i Aviacionit Civil dhe Policia e Shtetit kanë bërë 3 testime të fshehta për sigurinë në aeroport në datën 20 Prill 2016 dhe kanë arritur në përfundim që siguria nuk ekziston.
Mirëpo prej asaj dite e deri më sot, asnjë masë nuk është marrë.
Në të tre testimet, siguria e aereoportit ka dështuar të detektojë rrezikun. Tritoli është futur, po ashtu edhe thika. Por, më e rënda, është realizuar futja pikërisht në të njëjtën pikë ku u fut edhe makina e grabitësve.
Për 10 minuta simulatorët kanë çarë rrethimin dhe nuk janë kapur nga sistemi i kamerave të ICTS-së, i cili nuk ka funksionuar.
Top Channel posedon të plotë këtë raport tronditës dorëzuar aeroportit dhe Ministrisë së Transporteve në mes të muajit maj. Ai tregon sesa vulnerabël dhe i pasigurtë është aeroporti dhe sesa me indiferencë është trajtuar çështja nga “Airport Partners” dhe kompania ICTS, përgjegjëse për sigurinë e Rinasit.
Testimi sekret i 20 prillit 2016 i është njoftuar drejtuesve të aeroportit në 13 maj, duke ngritur alarmin e rëndë mbi cënueshmërinë e sigurisë së pistës së vetme ndërkombëtare në vend.
Sipas kësaj shkrese që Top Channel e disponon të plotë, tre testet e dështuara përfshijnë futjen e eksplozivit në bagazh dore dhe të detonatorëve, futjen e një thike të ftohtë përmes daljes së stafit dhe ekuipazhit dhe më e rënda edhe futjen në perimetrin rrethues, pikërisht aty ku ndodhi grabitja e pak ditëve më parë.
Raporti për dijeni edhe të Ministrisë së Transporteve i është dërguar drejtuesit të aeroportit të Rinasit në 13 maj. Por nga ICTS dhe aeroporti nuk u morr asnjë masë, së paku deri në 29 qershor, kur edhe ndodhi grabitja spektakolare në pistën e “Nënë Terezës”.
Ndërkaq, në disa media të tjera është shpërndarë lajmi që kompania Nazeri është në bashkëpronësi të vëllait të Nasip Naços, krahut të djathtë të Ilir Metës në LSI, i cili dha dorëheqjen nga posti i ministrit të Drejtësisë, pas kundërshtimit për reformën në Drejtësi. /tesheshi.com./
