Qeveria e Zoran Zaevit ka nisur menjëherë që të vendosë duart mbi plagët e lënë hapura nga regjimi i Nikolla Gruevskit.
Dhe natyrisht akti i parë do të shkonte te dhuna e 27 prillit, ku u masakrua Zoran Zaevi dhe Zijadin Sela.
Siç bëjnë të ditura mediat në gjuhën maqedonase, Ministria e Brendshme ka shtuar listën e policëve që do të përjashtohen përjetësisht nga uniforma, pasi akuzohen se kanë lejuar me dashje dhunën e huliganëve.
Deri tani me hetimin e Kontrollit të Brendshëm janë pezulluar 24 policë, ndërkohë që kundër 31 janë ngritur padi penale.
Midis policëve ka edhe agjentë të policisë sekrete, pjesëtarë të Njësisë për Ndërhyrje të Shpejtë, por edhe oficerë të lartë policie.
Siç bën të ditur televizioni pro VRMO-së, Sitel, pritet që lista e Zoran Zaevit të kapë edhe oficerë shumë të lartë të policisë, duke nisur nga drejtori i Byrosë për siguri Publike në Ministrinë e Brendshme, Mitko Çavkov, i cili auzohet se lejoi dhunuesit të rrahin deputetë. Ministri i ri i brendshëm, Oliver Spasovski ende nuk e ka marrë raportin e grupit të punës që hetoi nëse shtabi operativ në Ministrinë e Brendshme ka shkelur procedurat më 27 prill.
Siç bën të ditur agjencia publike e lajmeve në Maqedoni MIA, hetimi po nxjerr se ende nuk është analizuar nga ekspertiza pse sistemi “Tetra” për regjistrim të urdhrave në Ministrinë e Brendshme nuk ka punuar që nga viti 2014, i cili u realizua me 5 milionë euro nga BE-ja.
PëriIncidentet e 27 prillit, rolin kryesor në zbulimin e fajtorëve nuk e ka Prokuroria Publike, por ajo e Krimit të Organizuar, që ka lidhje të ngushtë me Prokurorinë Speciale.
Një raport special i Policisë bën të ditur se dy deputetë të VRMO-DPMNE-së, Kërsto Mukoski dhe Sasho Vasilevski kanë hapur dyert e Parlamentit dhe deputetët tjerë orientuan protestuesit që të arrijnë sallën e konferencave ku ndodheshin Zaev dhe Sela.
VMRO-DPMNE reagoi zyrtarisht sot dhe ka kërkuar që akuzën të mos e marrë Prokuroria për Krimin e Organizuar por ajo Publike.
“Prokuroria nuk duhet të shndërrohet në sektor të LSDM-së për drejtimin e fushatave politike. Pushteti nuk është dhënë njëherë e përgjithmonë, dhe për çdo tejkalim të autorizimeve dhe ligjeve do të ketë përgjegjësi”, deklaroi Nevenka Stamenkovska.
Deri më tani për “të enjten e përgjakshme” ka vetëm nëntë dënime me kusht. Dy persona dyshohen për “vrasje në tentativë”, pas rrahjes brutale të deputetit Zijadin Sela. /tesheshi.com/
