Gjuha nervoze e Ilir Metës përgjatë fushatës, e etiketoi si “Haki Droga”; por sot, kreu i Policisë së Shtetit Haki Çako, ka shpallur si prioritet luftën kundër kanabisit, pas përfundimit të misionit policor me zgjedhjet. Në një takim me vartës, Çako ka shprehur konsiderata lidhur me protagonizmin e policisë, korrekt sipas tij, gjatë procesit zgjedhor; dhe më tej ka shpallur se prioriteti i rradhës është ç’drogëzimi i territorit shqiptar.
“Jemi në një moment shumë deçiziv të një prioriteti tjetër të jashtëzakonshëm do ta quaja, që është ai i planit veprimit të luftës për parandalimin dhe goditjen e kultivimit të bimëve narkotike dhe trafikimit të tyre, e cila është një pjesë e strategjisë së qeverisë shqiptare, e Ministrisë së Punëve të Brendshme dhe e Policisë së Shtetit.
Ky prioritet kërkon angazhimin e gjithësecilit. Ky aksion kërkon të mos ndalet më në asnjë minutë. Veç aspektit të kontrollit të territorit i cili është baza dhe ju jeni të bindur të gjithë që ky rezultat që kemi aktualisht, është produkt i një pune të nisur që në fillim të vitit, që në janar me kontrollin e të gjitha ambienteve.
Me kontrollin e të gjitha tuneleve, serave ose ambienteve të dyshuara dhe zonave në risk. Çdo moment i fillimit të operacionit, dua që të ketë një angazhim sikur e fillojmë nga e para”, ka deklaruar Çako.
Më herët, vetë kryeministri është përbetuar se në fund të këtij viti, Shqipëria do jetë e pastruar pëllëmbë për pëllëmbë nga droga. Këtë e tha gjatë gjatë një interviste për Francë 24.
Droga është njolla më e madhe e qeverisjes së Ramës në 4 vitet e mandatit të parë. Pasi mbylli Lazaratin me nder, ai u turpërua nga një lazaratizimin i pashembullt i gjithë territorit shqiptar. /tesheshi.com/
