Radarët e vëzhgimit në det nuk funksionojnë. Kjo të paktën sipas një letre që Drejtori i Përgjithshëm i Policisë së Shtetit, Haki Çako, i ka dërguar më 31 gusht 2017 ministrit të Brendshëm në detyrë, Dritan Demiraj, ku e informon në lidhje me dështimin e aksioneve antidrogë.
Çako i referohet operacionit të mbrëmjes së 11 gushtit, ku forcat e policisë dështuan për kapjen e një gomoneje, që ishte nisur dy milje nga Plazhi i Zvërcenit, për shkak se qendra dha kordinata të pasakta të lëvizjes së mjetit, raporton BW.
Në letër thuhet se “mosdhënia e informacionit krijoi konfuzion dhe pati raste kur mjetet që merrnin pjesë në operacion filluan të ndiqnin njëra-tjetrën në hapësirën detare. Pas kapjes së gomones poshtë radarit të qendrës, rezultoi se nga sistemi nuk ishte konstatuar asnjë lëvizje”.
Në vijim, Çako ngre shqetësim edhe për situata të tjera të ngjashme, që kanë sjellë për pasojë dhe mosndërhyrjen e forcave të policisë.
“Në mjaft raste përfaqësuesit e policisë kanë kërkuar kthimin mbrapa të sistemit për ngjarje, me orare dhe data konktrete, të lëvizjes së mjeteve lundruese të konstatuara nga shërbimet e policisë, por në asnjë rast në sistem nuk ishin evidentuar dhe nuk u gjetën gjurmë të dhënash, megjithëse mjetet lundruese të kapura nga Guardia di Finanza në Itali kanë qenë me përmasa që duhet të ishin zbuluar, identifikuar nga ky system”, shkruan drejtori i Përgjithshëm i Policisë së Shtetit.
Ne letrën e tij, Çako thekson faktin se sistemi i vëzhgimit të hapësirës detare nga radarët, ka shfaqur probleme të shumta.
“Sistemi i vëzhgimit të hapësirës detare nuk iu përgjigjet nevojave operacionale, për kontrollin dhe mbikqyrjen e kufirit detar, dhe nuk bën të mundur identifikimin e mjeteve lundruese. Kjo situatë ka vështirësuar punën dhe shërbimin e efektivave tona në luftën kundër trafiqeve të paligjshme në hapësirën detare”, shkruan Çako. /tesheshi.com/
