Raportohet se sulmi i ri iranian ndaj Shqipërisë ka shënjestruar pikat kufitare, sistemet TIMS, duke detyruar kësisoj nxjerrjen e regjistrave për të punuar manualisht. Por gjithashtu kanë hyrë edhe në sistemin e survejimit me kamera sigurie.
Përmes faqes HomelandJustice, hakerat e Iranit kanë publikuar një video 6 minuta të gjatë ku shfaqet sistemi SMART PSS, i kontrollit qendror i të gjitha pikave të kalimit kufitar në RSH.
Ky është sulmi i dytë kibernetik që Irani bën ndaj Shqipërisë, pasi goditi shërbimet online në korrik.
Si pasojë e tyre, qeveria shqiptare ndërpreu marrëdhëniet diplomatike me Iranin pak ditë më parë.
Në një deklaratë nga Ministria e Brendshme thuhet se “Mbrëmjen e kaluar sistemet e ruajtjes dhe transmetimit të të dhënave në Policinë e Shtetit janë gjendur nën një sulm kibernetik të ngjashëm me atë që pësoi e-Albania në muajin korrik. Nga të dhënat paraprake rezulton që sulmi të jetë kryer nga e njëjta dorë. Ekspertët tanë bashkë me ata të vendeve tona partnere kanë punuar intensivisht prej momentit të parë kur është detektuar sulmi, për të garantuar së pari pacënueshmërinë e të dhënave dhe më pas neutralizimin e këtij akti kriminal.
