Një sulm i madh hakerësh është kryer këtë mëngjes ndaj faqeve të disa ministrive të Ukrainës, raportojnë agjencitë. Janë sulmuar faqet e Ministrisë së Mbrojtjes, të Arsimit, të Energjetikës dhe të Ministrisë së Jashtme. U hakerua edhe faqja e shërbimit të urgjencës shtetërore.
Disa nga faqet janë të paarritshme dhe një tekst në rusisht, polonisht dhe ukrainisht u shfaq në faqen e internetit të Ministrisë. “Ukrainas! Të gjitha informacionet për ju do të bëhen publike. Kini frikë dhe prisni më të keqen”, shkruhet në mesazhin mbi të cilin kryqëzohet flamuri ukrainas.
Sulmi ndodhi në një kohë tensionesh të mëdha midis Rusisë dhe Perëndimit për Ukrainën. Për shkak të pushtimit të mundshëm rus të Ukrainës, u zhvilluan disa raunde negociatash për të qetësuar tensionet, por pa sukses. Kujtojmë se Rusia ka grumbulluar rreth 100 mijë ushtarë përgjatë kufirit me Ukrainën.
Shtetet e Bashkuara janë “gati” për të gjithë skenarët me Rusinë, pavarësisht nëse është një vazhdim i dialogut apo një “përgjigje vendimtare” në rast të një sulmi ndaj Ukrainës, tha dje një bashkëpunëtor i ngushtë i Joe Biden, pas një jave dështimi diplomatik në bisedimet me Moskën.
“Tani do të shqyrtojmë dhe konsultojmë me aleatët dhe partnerët tanë për hapat e ardhshëm,” u tha gazetarëve në Shtëpinë e Bardhë Këshilltari i Sigurisë Kombëtare Jake Sullivan. Sipas shërbimit amerikan të inteligjencës, rusët ende nuk kanë “marrë një vendim përfundimtar” për një pushtim të mundshëm të vendit fqinj. /tesheshi.com/
