Nga Blendi Gashi
Thyerja dhe vjedhja e xhamive në Kosovë fatkeqësisht po shënon rritje, dhe, përkundër kësaj institucionet nuk po kanë një plan si t’i ndalin këto akte të ulwta.
Edhe pse pranë këtyre objekteve fetare ka kamera, ato nuk po i frikësojnë njerëzit me maska që shumicën e rasteve kanë target vjedhjen e parave që mblidhen për bamirësi.
Cak i hajnave të premten, pikërisht ditën e Fitër Bajramit (pas faljes së namazit) ishte xhamia e lagjes “Tophane” në Prishtinë, ku u vodhën paratë që u grumbulluan gjatë muajit të Ramazanit.
Rastin e ka konfirmuar edhe kryeimami i kësaj xhamie.
“Po hajnat e kanë thyer xhaminë dhe kanë vjedhur një shumë të parave që është tubuar gjatë muajit të Ramazanit. Kamera ka tek xhamia dhe me rastin po merret policia. Unë jam qe tre vite imam në këtë xhami dhe gjatë kësaj kohe nuk ka pasur raste të tilla, më herët nuk e di”, ka thënë imami i xhamisë, Jahja Rudari për tesheshi.com.
I pyetur se a duhet që objektet fetare të ruhen nga sigurimi për të parandaluar raste të tilla, hoxhë Rudari nuk ka dashur të flasë duke thënë se nuk është në kompetencë të tij.
“Unë jam vetën nëpunës për më tepër duhet të flisni me Bashkësinë Islame të Kosovës”, ka thënë ai.
Në faqen zyrtare të kësaj xhamie në Facebook, bëhet e ditur se hajnat kanë vjedhur një shumë prej afro 300 euro.
Lidhur me rastin në fjalë nuk ka një reagim nga BIK-u, por as nga institucionet tjera.
Portali ynë ka tentuar të marrë një përgjigje nga policia për të mësuar nëse janë arrestuar personat që kanë thyer dhe vjedhur xhaminë e Tophanes, por nuk janë përgjigjur në pyetjet e dërguara me email.
Thyerje të xhamive edhe në Pejë, Gjilan…
Por rasti i së premtes nuk është i vetmi kur xhamitë thyhen e plaçkiten në Kosovë, pasi raste të tilla janë shënuar edhe në komuna tjera.
Këtë muaj, saktësisht me datë 5 qershor është thyer edhe një xhami në rrugën “Lekë Dukagjini” të Pejës ku janë vjedhur 70 euro.
Më 15 prill të 2017-tës, një banor i komunitetit serb demoloi xhaminë e fshatin Llabjan të komunës së Novobërdës.
Ndërsa më 15 gusht të 2016-tës, një banor i komunitetit serb nga Pasjani, kishte dëmtuar minaren e xhamisë në fshatin Velekincë të Gjilanit.
Mbetet të shihet nëse institucionet do çelin sytë dhe do ndërmarrin ndonjë veprim për të ruajtur objektet e xhamive pasi ato çdo ditë e më tepër po bëhen cak i personave të pandërgjegjshëm. /tesheshi.com/
