Në Shqipëri nuk ka asnjë dëshmi për shkelje të qëllimshme të të drejtave pronësore të shtetasve shqiptarë që i përkasin pakicës greke.
Është kjo përgjigjia që komisioneri Johannes Hahn i ka dhënë eurodeputetes greke, Sofia Sakorafa, e cila i është drejtuar me një letër duke shprehur shqetësimet e Greqisë mbi prishjen e pronave të minoritetit grek në Himarë.
Pak ditë më parë, Ministria e Jashtme greke reagoi mbi miratimin e planit urbanistik të Bashkisë së Himarës, ku ndër të tjera parashikohen edhe prishjet e disa ndërtimeve pa leje. Greqia i ka kujtuar autoriteteve shqiptare se integrimi në BE kushtëzohet nga respektimi i të drejtave të minoriteteve, ku përfshihen edhe pronat e tyre.
Bazuar në këtë qëndrim eurodeputetja greke kërkoi nga Komisioneri për Zgjerimin mbajtjen e një qëndrimi mbi veprimet që cënojnë pronat e minoritetit dhe nëse këto veprime bazohen apo jo në standardet europiane.
Por Hahn në përgjigjen e tij i është referuar Raportit të Komisionit, që vë theksin në problematikën që kanë çështjet e pronësisë në Shqipëri, dhe që kanë të bëjnë me kthimin dhe kompensimin e pronave apo regjistrimin e tyre. /tesheshi.com/
