Pas përfaqësuesve të Parlamentit Europian për Shqipërinë, të cilët një ditë më parë lëshuan deklarata të forta nga Brukseli, pra Kukan dhe Fleckenstein, sot siç pritej ishte radha e krerëve më të lartë të BE-së: shefes së diplomacisë, Federica Mogherini dhe Komisionerin për Zgjerimin. Johanes Hahn.
Në një deklaratë të përbashkët nga Brukseli, dy drejtuesit e Komisionit i janë përgjigjur Lulzim Bashës që sot ka folur për ndërkombëtarë të korruptuar në një fjalëmbajtje të pazakontë në çadër.
“Qytetarët meritojnë të kenë një lidership të përgjegjshëm. Ne i bëjmë thirrje sërish politikanëve që të sillen në mënyrë të përgjegjshme, në respekt të institucioneve dhe të hapin rrugën për zgjedhje demokratike, në përputhje me standardet ndërkombëtare”, thuhet në deklaratën e zyrtarëve të lartë të BE-së.
Në më nyrë eksplicite ata kujtojnë Reformën në Drejtësi dhe shprehen se shumica e shqiptarëve e duan atë.
“U bëjmë thirrje partive që të përfundojnë formimin e institucioneve të vettingut. Sulmi i reformës në drejtësi dhe jo implementimi i saj, me monitorimin e ngushtë të ONM-së, dëmton të tashmen dhe të ardhmen e Shqipërisë”, vijon deklarata.
Ndërkaq, në pjesën e fundit të deklaratës Mogherini dhe Hahn bëjnë thirrje për çuarjen përpara të Vettingut dhe për këtë i është bërë thirrje “deputetëve të përgjegjshëm” si herën e parë në korrik. Në atë kohë SHBA dhe BE kur pa se PD nuk do të votonte reformën u bëri thirrje deputetëve të veçantë të PD-së.
Edhe këtë herë siç duket është kthyer kjo situatë.
“Ne presim që ata të jenë në shërbim të popullit shqiptar, që vazhdon të kërkojë që vettingu i nisur dhe reforma në drejtësi të implementohen, si një hap jetik për anëtarësimin e vendit në BE”, theksohet në fund. /tesheshi.com/
