Pak ditë nga nënshkrimi i marrëveshjeve të cilësuara “historike” mes Prishtinës dhe Beogradit, BE planifikon të nisë zyrtarisht negociatat për anëtarësim me Serbinë.
Lajmin e bën të ditur komisioneri i BE-së për Zgjerimin, Johannes Hahn, gjatë punimeve të samitit për Ballkanin Perëndimor në Vjenë.
“Jemi në një situatë, në të cilën së shpejti do të nisim bisedimet zyrtare për anëtarësimin e Serbisë në BE”, tha Hahn. Serbia ka mbetur vendnumëro në procesin e integrimit që nga nisja e bisedimeve vitin e kaluar. Zyrtarët europianë kanë këmbëngulur se procesi i normalizimit të marrëdhënieve me Kosovën, është pikë thelbësore për ecjen përpara të procesit të integrimit, por duket se nuk do të ketë kushte si njohja e Kosovës për pranimin e Serbisë në BE. Të paktën, jo në këtë fazë të bisedimeve.
Ndërkaq, media në Beograd shkruan se Bashkimi Evropian do të hapë kapitullin 35 në negociatat për procesin e anëtarësimit të Serbisë në BE, më 18 dhjetor të këtij viti.
Ky kapitull sipas shumë analistëve serbë nënkupton, në thelb, njohjen e shtetësisë së Kosovës nga Beogradi zyrtar.
Burime të medias në Beograd thonë se BE ka vendosur të hapë kapitujt 35 për Kosovën, kapitullin 32 për kontrollin financiar dhe kapitujt 23 dhe 24 për Drejtësinë, sigurinë dhe të drejtat e njeriut. /tesheshi.com/
