Krah Buzhalës për goditje anti-Erdogan të hënën në një prej studiove të debatit televiziv, ishte Vangjel Dule.
Paraprakisht duhet të thuhet se pos mëkateve në qeverisje, Ramës duhet t’i njihet merita e shfaktorizimit të një figure si Dule i PBDNJ-së, që pos varfërisë kulturore dhe ligjërimore në politikë, e ka të shkruar në ballë atë lloj ligësie politike që jo çdo kush e ka edhe kur ia fut kot. Ligësia është tej argumentit, edhe kur e ke apo nuk e ke këtë të fundit dhe veçon prej tij. Po mos qe media e fton, siç në rastin e fundit, askush s’do kujtohej politikisht për të.
Dule sulmoi Erdoganin për çështjen e Hagia Sophia-s të rikthyer në xhami, pas disa dekadash muze.
Ose nuk e di ose bën sikur nuk e di, se ai objekt kulti në zemër të Stambollit, dikur ish-simbol i Bizantit si katedrale, u ble nga osmanët e jo u rrëmbye. Mund të qe rrëmbyer, siç ka ndodhur zakonisht përgjatë historisë në rastet kur një palë i ka marrë pushtetin palës tjetër, por jo. Është blerë, njëherësh pra është shitur nga poseduesit që kanë futur florinjtë të xhep. Dhe këtu nuk ka padrejtësi por drejtësi. Më pas, objekti ka ndryshuar funksion brenda frymës, asaj të besimit, ku sërish është kryer adhurim ndaj Zotit. Muzeu për të cilin qan Dule ia hoqi këtë tharm, këtë thelb, këtë dimension që i jep shkëlqim e madhështi. Por sigurisht ka ndarje doktrinore që detyrojnë mbulimin e figurinave të pjesës orthodokse të objektit. Përndryshe, falja islame nuk vlen. Ato janë mbuluar e jo cenuar. Mundet dhe të hiqeshin fare, asgjë si ka penguar poseduesit e Hagia Sophia-s ndër shekuj, por jo, janë aty, në respekt të besimit të tjetrit, por jo në ndjekje të këtij besimi. Ja pra ç’duhet të dijë Dule, i cili nga ana tjetër investohet të zhbëjë prona e vakëfe muslimane mbi të cilat jeton minoriteti në Jug, për t’ja kaluar ato me ligj bashkëkombasve të tij.
Kjo është ajo thirrja për “zgjidhjen e çështjes së pronave” të minoritetit.
Fshatra minoritarë në Jug, referuar kadastrave osmanë, janë mbi prona të atyre që në gjuhën e gjuhën zyrtare të kohës quheshin “pronarë muhamedane”, ku dominonin gjirokastritë e delvinjotë, te të cilët punonte pakica greke. Por realitetet ndryshuan, i ndryshoi më saktë komunizmi. E tani, pasi përfituan toka dhe nga ligji anti-kombëtar 7051, politika e minoritetit kërkon të zhbëjë pronësinë reale të tokave në jug, për t’i bërë me ligj përjetësisht të vetat. Dule është në krye të këtij projekti. Simbolikisht, ky projekt mishërohet te rasti i fshatit Livadhja, 15 minuta larg Konispolit çam. Është ndër qendrat e minoritetit në Jug. Dikur quhej Hoxhë! /tesheshi.com/
