Gjykata Ndërkombëtare Penale (ICC) tha se sulmi kibernetik që goditi gjykatën në shtator ishte një përpjekje për spiunazh për të penguar misionin e ICC: hetimin e krimeve të luftës në mbarë botën.
ICC tha se nuk mund të konfirmonte se kush ishte pas sulmit dhe nuk zbuloi nëse ndonjë informacion i ndjeshëm ishte vjedhur.
“Dëshmitë që kemi tregojnë se ishte një sulm i synuar dhe i sofistikuar që synonte spiunazhin. Prandaj, sulmi mund të interpretohet si një përpjekje për të minuar mandatin e gjykatës”, thuhet në një deklaratë të GJNP-së.
Gjykata në Hagë ka në posedim të saj materiale sensitive lidhur me hetimet për krimet e dyshuara të luftës, duke përfshirë dokumente, fotografi dhe dëshmi të dëshmitarëve okularë, jeta e të cilëve, në rast të zbulimit të identitetit, mund të rrezikohet.
Sipas ICC, nëse zbulohet se disa të dhëna janë komprometuar, ajo do të kontaktojë menjëherë ata që mund të preken.
Prokurorët aktualisht po kryejnë 17 hetime për krime të dyshuara në Ugandë, Ukrainë, Venezuelë, Afganistan, territoret palestineze dhe gjetkë. /tesheshi.com/
