Kryeministri Rama ka bërë një lidhje mes zjarreve të verës në pyje e shkurre, me përmbytjet e ndodhura këto ditë. Shefi i qeverisë ishte në Vlorë, në zonën e tij elektorale, kur i bëri këto komente, shoqëruar me romuzin e njohur të “kazanit”, adresuar medias
“Ju gazetarët e Vlorës që jeni balli i kazanit të padurimit, edhe ju e shikoni vetë këtë punë dhe nuk keni çfarë të thoni.
Perfekt nuk ka, por p.sh. ajo që ndodhi lart në zonën lart në Llogara, edhe aluvioni që erdhi poshtë dhe preku një fushë aty të basketbollit, nuk e di çfarë inati kanë me basketbollin, janë rezultat i gërryerjeve dhe djegieve që u bënë gjatë verës.
Ne kemi filluar që tani të marrim masa për verën e ardhshme, do shtrëngojmë shumë fort edhe legjislacionin dhe nuk do falim askënd që do lozi me këtë pasuri, sepse përfituan nga qeveria teknike vjet”, tha Rama.
Pak vite më parë, ishte paraardhësi i tij, Sali Berisha, i cili shpjegoi përmbytjet në Shkodër me fenomene qiellore, si për të shmangur përgjegjësinë njerëzore. Ngjashëm shfaqet dhe Rama tashmë në gjykim, por duke e bërë përgjegjës pikërisht njeriun. /tesheshi.com/
