Dikur me ngulm e dëshironte ta rrëzonte LDK-në nga pushteti, por Albin Kurti tashmë e dëshiron me çdo kusht që ajo të mos mbetet në opozitë por së bashku me Vetëvendosjen ta formojnë qeverinë e re.
Sipas Kurtit, nëse partia e Isa Mustafës vendos që të mos bashkëpunojë me VV-në për formimin e qeverisë, kjo do të nënkuptonte mosvullnetin e LDK-së për të rrëzuar klanin “Pronto”.
“Pas dy mandateve si opozitë në Kuvend dhe pas mandatit të parë të qeverisjes së drejtë e të mirë në kryeqytet, Lëvizja Vetëvendosje është e gatshme të qeverisë me vendin. Përveç dijes e guximit, programit e kreativitetit, tash e kemi edhe përvojën. Që LDK të mbetet në opozitë, ky nuk është opcion. Mbetja në opozitë e LDK-së dhe mosbashkëpunimi me LV-në, do të thotë thjesht se LDK-ja po heq dorë nga synimi për largimin e Klanit Pronto nga pushteti, e kjo dorëheqje nuk i duhet as vendit e as popullit. Kur ndokush nga zyrtarët e lartë të LDK-së thotë se duan të jenë në opozitë, ata kësisoj vetëm sa inkurajojnë disa deputetë të koalicionit të saj (të cilëve ndoshta fort vështirë u qëndrohet në opozitë) që të shkojnë te PAN-i. Nuk mendoj se ky është qëllimi i tyre por e këtillë është pasoja. Njëkohësisht, nuk është korrekte që LDK ta konsiderojë veten po aq larg nga LV-ja sa nga PDK-ja, nëse beson atë që e thotë vetë, pra se shteti i Kosovës vazhdon të jetë shtet i kapur”, ka shkruar Kurti në Facebook, duke kërkuar nga LDK dhe aleatët të mos zhgënjehern me vendin e tretë, por t’i kthehen përpjekjes për t’i dhënë fund Klanit “Pronto”.
Më tej Kurti thotë se qytetarët kanë halle e nevoja andaj sipas tij e kanë dhënë edhe një shans për ta nxjerrë vendin nga kriza e për t’ia dhënë të mbarën Republikës./tesheshi.com/
