Nga Blendi Gashi
Përgjimet e nxjerra në dosjen “Habilaj”, ku implikohet edhe ish-ministri i Brendshëm shqiptar Saimir Tahiri, nxorën në pah se grupi i trafikantëve të drogës në fjalë, kishin shpërndarë rrjetin edhe në Prishtinë.
Të paktën kjo kuptohet nga një bisedë e përgjuar e dy anëtarëve të këtij grupi, Nazer Seitit dhe Armand Sulaj derisa flasin për organizim se si t’i marrin paratë e shitjes dhe shpërndarjes së mallit në Kosovë.
Por edhe pse kanë kaluar pesë ditë nga kur mediat shqiptare publikuan këtë skandal ku përfshihen edhe kosovarë, ende nuk është arrestuar asnjë person i dyshuar që është i lidhur me këtë grup kriminal.
Autoritetet kosovare në gjumë të thellë
Portali tesheshi.com ka kontaktuar me policinë për të marrë informata nëse deri më tani kanë ndonjë person apo më shumë të dyshuar për rastin në fjalë, por thonë se ende nuk kanë informacione zyrtare.
“Policia e Kosovës bazuar në procedurat e parapara ligjore trajton çdo informacion apo rast i cili ndërlidhet me punën dhe përgjegjësin policore në territorin e Republikës se Kosovës, mirëpo në rastin konkret nuk ka ndonjë informacion zyrtar.
Policia e Kosovës është institucion i zbatimit të ligjit dhe në të gjitha rastet ku ka informacione apo veprime të dyshuara do të ndërmerr veprimet e saja konform autorizimeve ligjore që ka”, thuhet në përgjigjen e dërguar nga Zyra për informim e policisë për tesheshi.com.
Policia nuk ka dhënë detaje kur është pyetur nëse është kontaktuar nga policia shqiptare dhe nëse kjo e fundit i ka kërkuar që të nis ndjekjen e kosovarëve të përfshirë në këtë grup kriminal.
“Policia e Kosoves ka bashkpunim me te gjitha agjencionet policore”, është përgjigja e përgjithësuar që ka dhënë policia.
Portali ynë ka kontaktuar edhe Prokurorinë e Shtetit për çka e ka pyetur nëse është duke hetuar ndonjë person të dyshuar për përfshirje në këtë orgaizatë kriminale, por nuk kemi marrë përgjigje nga zëdhënësja Liridona Kozmaqi.
Ndërsa policia dhe prokuroria kosovare bëjnë gjumin, policia shqiptare ka arrestuar Nazer Seitin, të enjten në periferi të Vlorës i cili ishte i ngarkuar për pjesën logjistike të grupit, por edhe për të lëvizur mes Shqipërisë e Italisë, madje edhe në Kosovë.
Gjykata e Katanias në dosjen prej më shumë se 416 faqesh në faqen 385 përmend edhe Kosovën, ku Seiti gjatë bisedës i thotë Sulajt se i duhej të udhëtonte drejt Prishtinës, ku do të merrte 200 mijë euro, ndërkohë që, sipas bisedës, rezulton se personi i kontaktit në Prishtinë nga ky transaksion kishte fituar 14 mijë euro.
Mbetet të shihet nëse Seiti pas kapjes nga policia shqiptare do të tregojë kosovarët e përfshirë dhe më pas i mbetet policisë kosovare t’i arrestojë ata.
Më poshtë mund të lexoni pjesën e përgjimeve që lidhet me Kosovës mes Seitit dhe Sulajt.
Seiti: Dreqi ta hajë, duhet të shkoj edhe në Prishtinë sapo të zbres në Vlorë…
Sulaj: ..hee.. për atë..
(Flasin duke ulur zërin..)
Seiti:…nuk e arrij dot në kohë..sepse ai mbyllet në orën 14:00..nga ora 08:00 deri në 14:00…për shembull..nëse ti shkon se ke për të marrë 200 mijë euro..ai të thotë për sot kam bërë vetëm 100 mijë.
Sulaj: Janë preciz vlla
Seiti: Ai atje..në Prishtinë..ai i ka dorëzuar 200 mijë, por ky që bën transaksionin..ka fituar 14 mijë euro, 100%.
Sulaj: I merr ai?
Seiti: Por normal, ajo është puna e tij.
Sulaj: Po për këtë transaksion, merr vetëm nga ty apo edhe nga ai tjetri?
Seiti: Jo…jo..unë s’kam të bëj..unë marr lekët cash..kam bërë marrëveshjen që në Milano..për të marrë lekët unë shkoj në Prishtinë..sepse këtu nuk mund të marrësh lekë cash.
Sulaj: Po..
Seiti: Çfarë bën? Unë mund të shkoj direkt ..dhe të marr në një orë 140 mijë euro..
Sulaj: Janë shumë të organizuar ata..
Seiti: Nuk ka kështu..jo prit nesër..jo sa ke..merr lekët dhe kaq.
Seiti: Ti mos shih se si i marrim ne paratë kështu..se paratë t’i marrin e t’i sekuestorojnë kështu sic i marrim ne…
/tesheshi.com/
