Kryeministri britanik Boris Johnson bëri sot një udhëtim “surprizë” në Kiev për t’u takuar me presidentin ukrainas Volodymyr Zelensky.
Fotoja e dy liderëve është publikuar në rrjetet sociale, ku ambasada ukrainase në Londër ka komentuar një “surprizë” duke vendosur një emoji me shkelje syri.
Një zëdhënës i Downing Street tha se Johnson ishte takuar me Zelensky “në një shfaqje solidariteti me popullin ukrainas”. Ai madje theksoi se ndër të tjera është duke u diskutuar për një paketë të re të ndihmës financiare dhe ushtarake për Ukrainën.
Dy liderët kanë pasur një takim katër me katër, por për momentin nuk dihet saktësisht se për çfarë kanë biseduar. Megjithatë, vetëm dje, kryeministri britanik foli me kancelarin gjerman Olaf Solz, të cilit i tha se Britania do të dërgonte më shumë armë në Ukrainë. Vlera e tyre i kalon 100 milionë paund.
Pas takimit, Boris Johnson shkroi në Twitter: “Sot takova mikun tim Presidentin Zelensky në Kiev, si shenjë e
mbështetjes sonë të palëkundur për popullin ukrainas. Ne po përgatisim një paketë të re ndihme financiare dhe ushtarake, e cila është dëshmi e angazhimit tonë në luftën e vendit të tij kundër pushtimit barbar rus”.
Kjo është vizita e parë e një udhëheqësi të G7 që nga fillimi i luftës me Rusinë. Zyrtarët ukrainas thonë se Johnson besohet të jetë një nga udhëheqësit në grupin kryesor mbështetës të Ukrainës dhe se ka vendosur sanksionet më të ashpra ndaj Rusisë.
Pak ditë më parë, kryeministri britanik dënoi tragjedinë në Bucha, duke thënë se ishte një “masake sistematike” ndaj njerëzve të pafajshëm.
“Unë mendoj se njerëzit që shikojnë atë që po ndodh në Ukrainë mund të shohin se kjo është një lloj masakrimi sistematik i civilëve të pafajshëm,” tha ai. /tesheshi.com/
