Përfundoi protesta e tetovarëve kundër ndotjes së ajrit. Protesta e sotme ka qenë më masive se ajo e djeshmja. Protestuesit nuk kanë reshtur duke bërë thirrje ndaj pushtetarëve që të zgjidhin çështjen e ajrit, sepse sipas tyre, ata janë fajtorët kryesorë për këtë gjendje.
Përveç partive opozitare dhe organizatave joqeveritare, ashtu siç përmendëm më herët, kjo protestë u shoqërua edhe me prezencën e një numri të madh artistësh. Para protestuesve kanë mbajtur fjalim, solisti i bendit të njohur shqiptar ‘Elita 5’, Arif Ziberi, i cili, duke folur për gjendjen e ajrit të Tetovës, e cilësoi atë si gjendje të mjerueshme.
“Nuk po kërkojmë diçka të madhe. Kërkojmë diçka që e kemi të drejtë, Zoti që na kafalë. Të jetosh afër malit Sharr dhe ta kesh ajrin e ndotur në këtë nivel është katastrofë”, tha Ziberi.
Para protestuesve me humor të zi janë drejtuar edhe drejtuesit e programit humoristik “Hallkit”, në Alsat M.
Thirrje për mbylljen e Jugohromit ka adresuar edhe Elmedina Abdullai nga “Nëna dhe Fëmija”, duke thënë: “ose ndaleni ju Jugohromin ose do ta ndalin ne”.
Ndërkaq organizatori i protestës së sotme, apo drejtuesi i “Eco Guerillas”, Arianit Xhaferi, në fjalimin e tij para protestuesve doli me ultimatum për autoritetet qeveritare që brenda një jave ta mbyllin fabrikën e Jugohromit, ndryshe do të ballafaqohen me popullin edhe më keq.
“Keni afat deri të premten e ardhshme në ora 00:00. Nëse nuk e mbyllni Jugohromin, atëherë do të ballafaqoheni me ne. Do t’i bllokojmë rrugët, gjykatat dhe të gjitha institucionet e Tetovës, derisa të zgjidhet kjo çështje. Konsiderojmë se s’ka arsye që të kemi ndotje të ajrit”, tha Arianit Xhaferi, duke shtuar se Komuna e Tetovës nuk ka bërë aq sa duhet që të zgjidhet kjo çështje./tesheshi.com/
