![Një ushtar izraelit qëndron me kompleksin e Xhamisë Al-Aksa në sfond [Dosje: Maya Alleruzzo/AP Photo]](https://tesheshi.com/wp-content/uploads/2024/12/Kolonet-izraelite-shkelin-status-quo-ne-ne-kompleksin-e-xhamise-Al-Aksa-360x180.webp)
Mançester Siti dhe Monako dhanë një shfaqje të vërtetë futbollistike mbrëmjen e së martës. Tetë gola në një ndeshje të fazës me eliminim të Champions League-s janë një rekord më vete.
Merita u takon të dyja skuadrave, edhe pse ishin anglezët ata që fituan 5-3. Mançester Siti ka ngritje të lojës së vet, duke lënë pas një periudhë të errët; Monako është një makinë golash, kryeson kampionatin francez dhe ka shënuar më shumë se çdo ekip tjetër në ligat elitare europiane.
Pep Guardiola kishte parashikuar një furtunë mbi të e mbi ekipin e tij nëse humbisnin. Fitorja pas një 90-minutëshi dramatik e ka bërë atë të mos përmbahet në deklarata.
“Ne mendojmë në sulm, sulm, sulm, sulm,” ka thënë ai pas ndeshjes.
“Të përjetosh këtë lloj përvoje do të na ndihmojë shumë për të ardhmen tonë si klub. Monako ka më shumë histori se ne në këtë aktivitet, dhe keni nevojë për këtë lloj përvoje për të mësuar dhe për t’u përmirësuar. Sigurisht, gjithçka mund të ndodhë në Monako, dhe ne duhet të shënojmë gola.”
Për Leonardo Jardim-in, teknikun e Monakos, është e pabesueshme ajo që ka ndodhur mbrëmë.
“Gjëja e parë që do të them është se mbase kjo qe një nga ndeshjet më të pabesueshme në Champions League këtë sezon.”
Ai është i mendimit se ekipi i tij luajti mjaft mirë, edhe pse humbi.
“Mendoj se Monako luajti vërtet mirë, dhe unë i urova lojtarët.”
Sipas tij, gjithçka mbetet e hapur, “Ne kemi dhe 90 minuta për të luajtur, dhe nuk ka mbaruar ende asgjë.” /tesheshi.com/
