Pep Guardiola e nisi dje zyrtarisht aventurën e tij të re në kampionatin anglez. Më shumë se për fitoren e vështirë ndaj Sandërlendit, trajneri i ri i Mançester Sitit ka qenë në qendër të vëmendjes për atë vendim të tij në takimin e djeshëm, duke lënë në stol Joe Hart-in, portierin e kombëtares së Anglisë.
Spanjolli ka parapëlqyer 34-vjeçarin argjentinas Caballero në vend të Hart-it, në një ndeshje të fituar 2-1 nga Mançester Siti. Që Guardiola nuk e kishte me sy të mirë gardianin anglez qe lënë të kuptohej që më herët, por nuk pritej që lënia e tij në stol të ndodhte që në takimin e parë në sezonin e ri të Premier League-s.
“Mendoj se ai (Caballero) kishte një parasezon të mirë. Ai më dha goxha besim, ka personalitet, dhe kjo është arsyeja pse e zgjodha atë,” ka shpjeguar tekniku spanjoll pas ndeshjes së djeshme.
Mançester Siti udhëton të hënën drejt Rumanisë, ku do të ndeshet me Steauanë e Bukureshtit për play-off-in e Champions League-s. I pyetur në do aktivizohej Hart në këtë takim, Guardiola do të jepte këtë përgjigje, që nuk thotë asgjë: “Sigurisht, mund të luajë. Të gjithë lojtarët në skuadër mund të luajnë.”
Gjithsesi, shtypi sportiv në Angli përcjell idenë se kohët e arta të Hart-it te Mançester Siti kanë marrë
fund. Aq më tepër që në Spanjë po flitet gjithnjë e më shumë për një kalim të portierit kilian të Barcelonës, Claudio Bravo, te Mançester Siti. Burime të afërta me portierin kilian e bëjnë thuajse të kryer marrëveshjen me Barcelonën. Veçse mosha e madhe e Bravo-s, 33 vjeç, e bën atë një zgjidhje joafatgjate.
Mançester Siti pati dje fat ndaj Sandërlendit, pasi e mori trepikëshin pas një autogoli të McNair-it tre minuta para mbylljes së takimit. /tesheshi.com/
