Presidenti Meta, në daljen e tij të radhës para mediave, siç pretendon, për të denoncuar një “grusht shteti” të mazhorancës ndaj Kushtetutës për emërimet në Gjykatën Kushtetuese, shënjestroi, ngjashëm si me Dvoranin, ministren e Drejtësisë Etilda Gjonaj.
Sipas Metës, ajo duhet të japë dorëheqjen deri të hënën, pasi është pjesëmarrëse në krim. E për më tepër, do çohet për kallëzohet penalisht në SPAK.
“Partnerët janë njohur me shkeljet nga Ministria e Drejtësisë. Në këtë tentativë për grusht shteti, bazuar në provat që u bënë publike dje rezulton të jetë e përfshirë drejtpërdrejt Etilda Gjonaj dhe institucione në varësi të saj, duke përvetësuar një kompetencë që kushtetuta ia jep presidentit. Gjonaj ka shkelur ligjin për organizimin e Qendrës së Botimeve Zyrtare. Gjonaj urdhëroi botimin në Fletoren Zyrare të akteve të KED-së, por nuk ka të drejtë të dërgojë për botim këto akte.
Sipas Kushtetutës, vendimet e KED-së nuk botohen në fletoren zyrtare por publikohen vetëm në faqen e internetit të Gjykatës së Lartë. Asnjë diplomat nuk e ka ditur që në Ministrinë e drejtësisë, një grup kriminal ka kryer këto veprime. Ajo, bashkë me zyrtarë të lartë ka kryer disa vepra penale. Do të dorëzojmë kallëzim penal në SPAK ndaj Gjonaj dhe disa zyrtarëve. Gjonaj e ka humbur tërësisht besimin e presidentit. Pres deri të hënën dorëheqjen e ministres Gjonaj”, u shpreh Meta nën tensionin e zakonshëm.
Morri një përgjigje pak minuta më vonë nga vetë ministrja në fjalë.
“Jam e gatshme t’i përgjigjem ligjërisht, me të gjithë përgjegjësinë po edhe me krenarinë që i përkas Frontit të Reformës në Drejtësi, denigruesit botërisht të njohur të kësaj reforme jetike!
Sa për dorëheqjen, zotëria ka në dorë vetëm të tijën dhe të askujt tjetër. E përshëndes Presidentin që pas disa shfaqjesh publike pa ekuilibër etik, ka zgjedhur t’i drejtohet SPAK me një kallzim penal për mua; një marrëzi e radhës po të paktën në rrugë institucionale, madje drejt një institucioni të dalë nga Reforma që ai lufton pa fre!”, shkruan Gjonaj. /tesheshi.com/
