Kreu i PD-së Lulzim Basha do të ketë zyrtarisht në garë përballë tij Eduart Selamin, ish-kryetar i kësaj partie dy dekada më parë.
Selami, zhvilloi sot në selinë blu një takim me grupin e punës.
Ai tha se nuk u takua me Bashën dhe se do të bëjë një deklaratë për mediat në orën 17:30 nga selia e PD-së.
Deri më tani Selami është i vetmi kandidat zyrtar, por që nuk i është bashkuar grupit rebel që kërkon ikjen përfundimtare të Bashës nga partia.
Ky grup akoma nuk ka nxjerrë një emër si kandidat rival ndaj Bashës.
Madje Selami nuk ka hedhur asnjë akuzë ndaj Bashës duke u shprehur sot se “Nga ky proces do të dalim më të fortë”.
Selami e shpalli kandidaturën për zgjedhjet që kjo forcë politike do të organizojë në korrik fill pas deklaratës së Bashës që ngriu funksionet e tij si kryetar deri në zgjedhje.
“Demokratë të nderuar! Me ndjenjë përgjegjësie dhe synim për t’i rikthyer së bashku PD, lavdinë e merituar, shpall kandidaturën për Kryetar!”, shkruan Selami në profilin e tij./tesheshi.com/
