Grupet palestineze Fatah dhe Hamasi kanë arritur një marrëveshje pajtimi. Kjo u bë e ditur nga shefi politik i Hamasit, Ismail Haniyeh. Presidenti i Autoritetit Palestinez, Mahmud Abbas, tha se marrëveshja përbënte “një deklaratë për fundin e ndarjes dhe kthimin në unitetin kombëtar palestinez”.
Marrëveshja, e cila vjen pas dy ditë bisedimesh intensive në selinë e inteligjencës egjiptiane në Kajro, është përqendruar në integrimin e zyrtarëve të Hamasit në ministritë përkatëse të Autoritetit Palestinez, rindërtimin e sistemit policor të Gazës dhe menaxhimin e përbashkët të kalimeve të Rripit.
Zyrtarët izraelitë iu përgjigjën marrëveshjes në një ton diplomatik, duke thënë se ” do të ndjekë zhvillimet në terren dhe do të veprojë në përputhje me rrethanat”. Megjithatë, ata paralajmëruan për përpjekjet e vazhdueshme terroriste nga Hamasi, duke shtuar se çdo marrëveshje pajtimi duhet të përmbushë kushtet e Kuartetit të Lindjes së Mesme, që përfshin OKB, SHBA, BE dhe Rusi, të cilat kërkojnë që Hamasi të njohë Izraelin dhe të çarmatoset.
Përfaqësuesit e të dy organizatave mbajtën një konferencë shtypi dhe një ceremoni të shkurtër nënshkrimesh për zbulimin e detajeve të marrëveshjes. Televizioni egjiptian publikoi fotot e dy drejtuesve të delegacioneve, Azzam al-Ahmed dhe Salah Al-Arouri, duke nënshkruar marrëveshjen e pajtimit në prani të ministrit të inteligjencës egjiptiane Khaled Fawzy.
Çështja e krahut ushtarak të Hamasit dhe strategjitë më të gjera politike do të diskutohen në një datë të mëvonshme./tesheshi.com/
