Ish kryeministri i Maqedonisë, dhe lideri aktual i VMRO-DPMNE-së, Nikolla Gruevski, në një intervistë dhënë për televizionin nacional “Kanal5” ka bërë të ditur se partia e tij është në përgatitje e sipër të një dokumenti i cili do të mundësojë daljen e vendit nga kriza e thellë politike dhe në të njëjtën kohë do të ruante unitetin e vendit.
Sipas Gruevskit, ky dokument nuk favorizon as parti politike, as bashkësi etnike, por se është një e mirë e përgjithshme. Shumë shpejt sipas tij, dokumenti në fjalë do t’i dorëzohet partive më të mëdha politike në vend.
Ai po ashtu i ka bërë thirrje popullit që ta mbrojë shtetin, ndryshe ata rrezikojnë të mbeten pa shtet amë.
“Është e nevojshme që kombi ta mbrojë shtetin e tij sepse shtetin mundet të mos e kemi. Të mos mendohet se nuk e kam thënë ja po e përsëris, nëse populli nuk e mbron shtetin mundet ta humbin. Të gjithë ato që mendojnë se tani do t’i lënë të formojnë Qeveri dhe të reagojë kur do vije ligji i gjuhëve në rend dite atëherë mundet të jetë vonë për reagime. Paralajmëroj: Mundet të vije deri aty që të mos kemi shtet”, deklaroi Gruevski.
Në pyetjen e gazetarit se çfarë mund të ndodhë nëse nuk respektohet dëshira e popullit dhe a mundet të kontrollohet turma e njerëzve Gruevski tha se partia e tij do veprojë vetëm sipas ligjit por asnjëherë nuk mundet ta dijë dhe parashikojë se çdo të bëjë populli.
“Le ta mendojë ai që shkon kundër kombit. Asnjë nuk mundet ta dijë se si do reagojë populli ndaj asaj që bënë Zaevi”, tha Gruevski.
Për krizën politike në të cilën ndodhet vendi, Gruevski e ka akuzuar kreun e LSDM-së, Zoran Zaevin, se në këtë mënyrë ai si një “kriminel i aboluar përpiqet t’i fshijë krimet e tij”. Megjithatë Gruevski ka ripërsëritur qëndrimin e partisë së tij se nëse Zaev tërhiqet nga “platforma tiranase” ato do i ndihmojnë ta formojë Qeverinë në të kundërt nga VMRO këmbëngulin për zgjedhje të parakohshme parlamentare bashkë me ato lokale.
Maqedoninë pritet ta vizitojë të martën, eurokomisari Johannes Hahn së bashku me tre eurodeputetë tjerë. Siç kanë paralajmëruar, ata janë në një mision për ta ndihmuar formimin e qeverisë së re.
Jo rastësisht, për ditën e nesërme LSDM së bashku me partitë shqiptare parlamentare kanë njoftuar mbledhjen e Kuvendit, dhe mbajtje të seancës së rregullt ku pritet të zgjidhet edhe kryeparlamentari.
Mensur Krasniqi – /tesheshi.com/
