Nga Mensur Krasniqi
Nikola Gruevski, lideri i VMRO-së, partisë fituese të zgjedhjeve të parakohshme të 11 dhjetorit, u shfaq për herë të parë në një intervistë televizive që pas përfundimit të këtyre zgjedhjeve, për të folur rreth situatës së pazakontë nëpër të cilën po kalon Maqedonia. Duke e çuar gjithnjë gjuhën atje ku dhemb dhëmbi, tek faktori shqiptar, ai e tha qartazi se bisedimet me BDI-në kanë dështuar për shkak të mospranimit të dygjuhësisë në tërë territorin e Maqedonisë dhe se vetëm për këtë kanë folur në 95 për qind të rasteve.
“I thashë BDI-së se nuk ka asnjë logjikë të ketë dygjuhësi në një vend ku shqiptarët janë 25% ndërsa maqedonasit 65%. Kjo është e dëmshme dhe shqiptarët nuk fitojnë asgjë. Shqiptarët jetojnë në pjesën perëndimore dhe kanë të drejtë ta përdorin gjuhën, këtë e kanë pasur edhe para Marrëveshjes së Ohrit, edhe pastaj. Ne gjithashtu nuk e pranuam Platformën Shqiptare që e kanë krijuar në një shtet të huaj”, tha Gruevski duke theksuar se nuk ka mundësi të rinegociohet për Marrëveshjen e Ohrit, gjë që sipas tij kërkohet në Platformë, sepse kjo do të sjell konflikte. “Kërkesa romantike”, i quajti Gruevksi gjithë ato çka parashtrohen në Platformën Shqiptare.
Më tej, Gruevski ka sulmuar të ashtëquajturat prej tij “media të Sorosit”
“Mediat e Sorosit dhe partitë shqiptare ma kanë nxirë fytyrën para shqiptarëve. Politikanët shqiptarë, nga paaftësia e tyre më sulmojnë mua publikisht dhe thonë që VMRO nuk ka lejuar diçka të ndërtohet. Ne kemi lejuar të bëhen gjëra logjike, gjithnjë. Kam gabuar që nuk kam dalë më shpesh nëpër mediat shqiptare. Sepse unë kam qenë shumë i mirë edhe për shqiptarët edhe për maqedonasit”, tha mes tjerash Gruevski.
Por risi në ligjërimin e Gruevskit gjatë intervistës ishte dhe përfshirja e hoxhallarëve. Sipas tij, ishin këta të fundit si dhe ish-komandantët e UÇK-së që ndihmuan LSDM- në të marrë vota në hapësirat shqiptare.
Kreu i VMRO-së sërish kërkoi zgjedhje të parakohshme duke theksuar se ato do ta shpëtonin Maqedoninë ndërsa kërcënoi BDI-në (nëse shkon me LSDM-në) që mos të kërkojë më principin “fituesi me fituesin”, sepse, siç tha ai, “kush do ta kërkojë atë, do ta flakë jashtë menjëherë nga shtabi”.
“E di shumë mirë BDI-ja, sa kohë ka lutur për këtë princip, e di mirë që nëse e shkel, më nuk do të ketë asnjëherë”, përfundoi Gruevski. /tesheshi.com/
