Kryeministri maqedonas, Nikola Gruevski, i pranishëm në forumin Kombëtar të Vjenës, të mbajtur sot në Tiranë, ia ka vënë fajin fqinjit jugor të Maqedonisë, Greqisë, për shtyrjen e negociatave me BE-në.
“Maqedonia është e përkushtuar dhe e përqendruar në reformat që nevojiten të zbatohen sa më shpejt dhe për të qenë e pregatitur për tu bashkuar në BE. Negociatat me BE-në janë shtyrë për shkak të problemit të fqinjit tonë në jug. Shtyrja nuk është zgjidhje. Krijon probleme të tjera, pasiguri e është një dëm real për ne dhe rajonin. Po të mos kishin ndodhur këto, jo vetëm që Maqedonia do të kishte qenë anëtar i NATO-s, por gjithçka do të kishte pasur një rrjedhë tjetër”,- tha Gruevski.
Megjithatë ai shtoi se Maqedonia po punon për reformat në vijimësi dhe shtoi se është mirë që të gjithë vendet në rajon të bëjnë të njëjtën gjë, pasi sipas tij, vetëm kështu mund të ecim përpara.
“E rëndësishme është tregtia e lirë mes nesh dhe një bashkëpunim i mirë rajonal, pasi vetëm kështu mund të ecim përpara dhe të ndihmojmë njëri-tjetrin. Duhet të jemi të kujdesshëm dhe të përgjegjshëm në deklarata dhe mesazhet që dërgojmë, pasi çdo mesazh i thënë në mënyrën jo të duhur, mund të krijojë ndjesi negative tek qytetarët”,- u shpreh Gruevski.
Ai deklaroi se Maqedonia dëshiron të jetë e përfshirë në iniciativa të tjera të përbashkëta. Gruevski shprehu besimin se Bashkimi Europian duhet ti kushtojë më shumë vëmendje rajonit.
“Duhet të ketë më shumë përpjekje e energji për të ndihmuar rajonin të zgjidhë disa çështje e të ecë përpara”,- tha ndër të para kryeministri maqedonas./tesheshi.com/
