Dhjetë nënshkrimet që dje BDI vendosi t’ia japë Zoran Zaevit të LSDM-së për marrjen e mandatit për formim të qeverisë, sipas deputetit të BDI-së, Artan Grubi janë vetëm të karakterit formal dhe kjo nuk do të thotë që janë në pajtueshmëri të bëjnë koalicion me LSDM-në.
“Për ne, gjithnjë ka qenë e rëndësishme përmbajtja dhe jo forma. Përmbajtja nënkupton që të gjitha kërkesat e shqiptarëve dhe arritjet, ndërkaq forma paraqet dhënie të nënshkrimeve ose pjesëmarrje në Qeveri. Pa arritjen e plotë dhe zbatimin e pakusht të propozim-ligjit për gjuhën shqipe por edhe të gjitha elementet e Deklaratës së Shqiptarëve, nënshkrimet janë vetëm formalitet”, ka thënë Grubi.
Kujtojmë edhe deklaratën e djeshme të zëdhënësit të BDI-së, Bujar Osmani, i cili nuk përjashtoi mundësinë që BDI të mbetet në opozitë sepse qëllimi i tyre është realizimi i programit dhe jo pjesëmarrja me çdo kusht në qeveri. /tesheshi.com/
