Nga Mensur Krasniq
Prokurorja speciale e Maqedonisë, Katica Janeva, promvoi të premten “Titanik”-un e saj, një operacion hetimor që do përfshijë disa çështje të nxehta, kryesisht politike, e që pritet të çojë në pranga zyrtarë të lartë. Por siç dihet, Titaniku përmban një metaforë të trishtë: atë të diçkaje impozante, madhështore, të fuqishme, sfiduese, por që u sfidua për ironi të fatit nga një masë akulli në e cila do e çonte në fund të oqeanit, duke e tretur dalëngadalë mes dallgëve. Por a ka gjasë të ketë të njëjtin fat pra dhe Janeva, “Titanik”-u i saj i frikshëm?! A do mundet ajo t’i bëjë ballë dallgëve të një politike tipike ballkanike si ajo e vendit të saj që nuk të le të bësh xhap, edhe nëse ke vullnet për t’i treguar dhmbët atij që ka shkelur ligjin, cilido të jetë ai?! Apo do jetë një “Titanik” që në goditjen më të parë që mund t’i vijë, do plasaritet, çahet, fundoset?!
Për fat të mirë, ka prej atyre analistëve që mendojnë se Janeva dhe “Titanik”-u i saj do mund të rezistojë dhe do çajë përpara.
Më konkretisht, sipas kryetarit të Qendrës për Demokraci dhe Zhvillim, Orhan Murtezani, vendimi i prokurores speciale për arrestimin e të inkriminuarve në manipulimin e zgjedhjeve është një mesazh dhe paralajmërim shumë i qartë deri te partitë politike në pushtet se megjithatë sistemi ka filluar të çlirohet nga kthetrat e partisë dhe ndikon pozitivisht në krijimin e parakushteve për mbajtjen e zgjedhjeve fer dhe demokratike.
“Gjithashtu mendoj se ky rast është inkurajues edhe për qytetarët që të munden lirshëm ta shprehin vullnetin e tyre. Në këtë periudhë kur kemi një konsensus më të gjerë shoqërorë dhe një mbështetje të madhe të opinionit publik si dhe të partive politike opozitare në drejtim të dekriminalizimit të shtetit dhe normalizimit të institucioneve, mendoj se prokurorja speciale duhet të iniciojë hetime edhe për ‘’peshqit e mëdhenj’’ në majat e piramidës së pushtetit, ngaqë ndryshe nuk do kishte kuptim nëse procesi përfundon me kalkulime politike, kjo do e dëmtonte këtë proces dhe edhe më tej do e pamundësonte ndërtimin e një shteti të mirëfilltë demokratik ku do sundojë ligji”, u shpreh për tesheshi.com Orhan Murtezani.
Por edhe përkundër faktit që kjo prokurori dëshmon se ka kapacitetet e mjaftueshme kadrovike dhe profesionale për ta çuar deri në fund këtë proces, Murtezani mbetet i shqetësuar nga gjyqësori skajshmërisht i politizuar i cili duhet ti procesojë këto lëndë.
Ndërkaq, analisti Ali Maksuti, nga prokurorja speciale kërkoi hetimin edhe të rasteve tjera politikisht të montuara si Monstra, Lagjja e Trimave dhe Magjar Telekom. Pra të mos kursehet askush, qofshin ato edhe lider politik , ministra, drejtor, anëtarë të komisioneve etj.
“Prokuroria me vendimet që bëri tregon se institucionet shtetërore kanë një fije shprese se do mund të kthehen në shërbim të të gjithë qytetarëve dhe jo vetëm në shërbim të dy partive politike , BDI dhe VMRO-DPMNE. Prokuroria Speciale përveç që duhet të hap gjithë hetimet në lidhje me manipulimin e zgjedhjeve , gjithashtu duhet të hap hetime edhe për rastet e montuara politike dhe etnike, siç janë Monstra, rasti Kumanovës, Magjar Telekomi, manipulimet tjera financiare të institucioneve të shtetit, vrasjet e dyshymta dhe të montuara dhe kjo të bëhet pa mos kursyer asnjë person të inkriminuarm, qoftshin ato lider politik , ministra, drejtor, anëtarë të komisioneve, apo kushdoqoftë”, deklaroi për tesheshi.com, Ali Maksuti.
Në vazhdim, Maksuti shtoi se Prokuroria Speciale përveç që duhet të hap gjitha rastet e dyshimta, gjithashtu duhet të bëj presion edhe në gjyqësor, që rastet mos të përfundojnë në mjegull, sepse qytetarët kanë dyshime edhe në institucionet gjyqësore për selektim të rasteve.
“Nëse rastet nuk do nxjerin në shesh të vërtetat atëherë do krijohen dyshime se Marrëveshja e Përzhinos është marrëveshje për të siguruar “kokat” e funksionarëve të caktuar politik dhe jo për të siguruar dhe krijuar institucione të pavarura nga politika”, përfundoi Maksuti.
Dhe për të dëshmuar politizimin e gjyqësorit në Maqedoni portali tesheshi.com kujton që Gjykata dje nuk e pranoi kërkesën e Prokurorisë Speciale Publike për përcaktimin e masës së paraburgimit për tetë të dyshuar për parregullsi zgjedhore në rastin “Titanik”. Në mesin e tyre ishin edhe ish ministrja e punëve të brendshme Gordana Jankullovska, ish ministri për transport dhe lidhje, Mile Janakievski dhe kryetari i komunës së Pustecit në Shqipëri, Edmond Temelko. Këta pasi janë marrë në pyetja nga gjykatësi parahetimor, janë lëshuar të mbrohen në liri. /tesheshi.com/
