Administratorja e Agjencisë Amerikane për Zhvillim (USAID), Samantha Power, tha në Beograd se progresi në procesin e normalizimit të marrëdhënieve ndërmjet Serbisë dhe Kosovës do të krijojë një klimë për investime dhe do të ndihmojë të dyja ekonomitë, por edhe të gjithë rajonin, transmeton Beta.
“Ndërsa normalizimi përparon, ne do të jemi në gjendje të ndihmojmë të dyja palët të zhbllokojnë edhe më shumë potencialin e tyre ekonomik. Në një nivel bazë, normalizimi do të bëhet një simbol për tregjet globale me sfidat që po përballen. Do ta bëjë më të lehtë për sektorin privat duke krijuar një klimë për investime dhe që i gjithë rajoni të bëhet i fortë,” u tha ajo gazetarëve në një konferencë në Beograd.
Ajo vlerësoi përkushtimin e presidentit serb Aleksandar Vuçiç për dialog dhe shtoi se SHBA-të ofrojnë mbështetje të fortë.
Ajo theksoi se herën e fundit që ishte në atë vend, në vitet 1990 si gazetare, askush nuk mund ta imagjinonte që marrëdhëniet mes SHBA-së dhe Serbisë do të përparonin kaq shumë.
“Pastaj pati sanksione, luftëra. Ishte e paimagjinueshme që qeveria amerikane të investonte 1.2 miliardë dollarë gjatë 20 viteve dhe të përpiqej të forconte integrimin e Serbisë në shoqërinë perëndimore dhe para së gjithash të ndihmonte në ndërtimin e shoqërisë civile, pavarësinë e mediave”, shtoi ajo.
Power thotë se përshtypja kryesore që i ka lënë kësaj here ka qenë dinamizmi dhe gjallëria e të rinjve në Serbi.
“Ende nuk e kemi arritur qëllimin që synojmë, ndoshta nuk e kemi gërvishtur as sipërfaqen se sa mund të rritet ky partneritet. E shoh dinamizmin, gjallërinë e të rinjve, më vjen mirë të dëgjoj për investimet amerikane”, tha ajo.
Lidhjet mes SHBA-së dhe Serbisë kanë ekzistuar gjithmonë, shtoi ajo, dhe për të si drejtoreshë e USAID-it, motivi është forcimi i lidhjeve mes dy qeverive.
“Gjithçka që bën SHBA për të mbështetur reformat në Serbi është punë që e ndihmon Serbinë të përmirësojë pozicionin e saj në rrugën drejt BE-së, askush nuk mund të parashikojë se kur do të përfundojnë reformat apo kur do të bëhet anëtare, por jemi të bindur se Serbia është në rrugën drejt BE-së dhe se investimet tona do të ndihmojnë”, shtoi ajo.
Përveç synimit të anëtarësimit në BE, theksoi ajo, shoqëria serbe tashmë po përfiton shumë nga reformat.
Ajo vlerësoi ndihmën e Serbisë për popullin ukrainas dhe shtoi se të enjten do të udhëtojë në Nish dhe Kosovë. /tesheshi.com/
