Në nisje të fushatës zgjedhore, gruaja që drejton KQZ-në në Kosovë, Valdete Daka, u çuar një mesazh të gjitha partive që “të kafshojnë” gjuhën gjatë ligjërimeve elektorale; pra të mos fyejnë e denigrojnë askënd.
Ajo u ka kujtuar se Paneli Zgjedhor për Ankesa dhe Parashtresa (PZAP) do të vendosë gjoba për ata që nuk i respektojnë rregullat në këtë proces zgjedhor.
Në një intervistë për gazetën “Epoka e re”, Daka ka vlerësuar thënë pavarësisht prej sfidave, KQZ-ja do të organizojë zgjedhje të lira dhe demokratike në çdo cep të Kosovës.
Ajo ka bërë me dije se janë ndërmarrë masat për t’i parandaluar manipulimet e mundshme më 11 qershor.
“Në ditën e parë të fushatës nuk ka pasur ndonjë parregullsi apo shkelje të rregullave. Si kryetare e Komisionit Qendror të Zgjedhjeve i ftoj të gjitha subjektet politike dhe të gjithë pjesëmarrësit e tubimeve të fushatave zgjedhore që gjatë këtyre ditëve t’u përmbahen rregullave të parapara, ta respektojnë Ligjin për Zgjedhjet e Përgjithshme, t’i respektojnë rregullat për fushatë zgjedhore, si dhe gjuha e fushatës të jetë demokratike e jo denigruese. Me siguri se Paneli Zgjedhor për Ankesa dhe Parashtresa (PZAP) do të shqiptojë gjoba për ata që nuk u përmbahen rregullave të fushatës zgjedhore dhe dispozitave ligjore”, ka deklaruar Daka. /tesheshi.com/
