Nga Mensur Krasniqi
Mbajtja e fjalimit të kryetarit të Lëvizjes Besa në protestën e djeshme të organizuar nga Këshilli Opozitar shqiptar, ka irrituar jashtë mase Sekretarin e përgjithshëm të Lëvizjes për Reforma në PDSH, Arben Taravarin. Ai nuk hezitoi që këshillin opozitar ta quante “Këshilli Opozitar i Besës”, kundrejt paralajmërimit se do ketë vetëm dy bashkëbisedues të Këshillit Opozitar.
“Uroj që populli shqiptar në Maqedoni të ketë kuptuar lojërat e Këshillit Opozitar të Besës. Pas konferencës së shtypit të tyre të mbajtur pardje, në fund të protestës duhej të flisnin vetëm dy përfaqësues të Këshillit Opozitar, por doli se edhe Bilall Kasami na qenka anëtar i Këshillit Opozitar të Besës! Ne do të vazhdojmë të bëjmë përpjekje për bashkëveprimin e opozitës shqiptare në Maqedoni dhe njëkohësisht të denoncojmë ata që e pengojnë për kapriço personale! Uroj që sot të kemi kuptuar kush është Bajraktar! Mesazhi kryesor i protestës së sotshme ishte se opozita e bashkuar shqiptare pa asnjë problem mund të fitojë BDI-në dhe PDSH-në së bashku!”, ka shkruar në facebook, Arben Taravari.
Ka qenë i menjëhershëm reagimi i Këshillit Opozitar, duke thënë se organizatori i protestës i cakton rregullat, ndërsa organizatorë ishin Këshilli Opozitar dhe fjalë rasti patën vetëm anëtarët që kanë pranuar legjitimitetin e këtij Këshilli, si Lëvizja Besa.
Sipas Këshillit Opozitar meritat më të mëdha për organizimin e protestës masive i takojnë pikërisht strukturave të Lëvizjes Besa, të cilët kanë kryer punën më të madhe në aspektin organizativ.
“Ashtu siç ishte paralajmëruar, në protestë fjalë rasti patën vetëm anëtarët e Këshillit Opozitar, siç edhe ishte vendosur në mbledhjen e fundit të këtij këshilli. Këshilli Opozitar konstaton se protesta ishte e qetë, organizimi ishte përtej parashikimeve më optimiste – në të nuk pati as edhe një incident të vetëm dhe protestuesit u shpërndanë në mënyrë paqësore, ashtu siç edhe kishin ardhur para Qeverisë”, – thuhet në kumtesën e Këshillit Opozitar.
Protesta e djeshme ishte më e madhja e organizuar ndonjëherë në Shkup nga shqiptarët. Në bazë të përllogaritjeve zyrtare të Këshillit Opozitar, në këtë protestë morën pjesë rreth 30.000 njerëz, që erdhën nga të gjitha anët e Maqedonisë.
“Përveç këtij fakti të rëndësishëm, sepse kjo masë njerëzish i mbështeti dhe legjitimoi kërkesat e kësaj proteste, po aq e rëndësishme ishte edhe fakti se dje u theksua se shqiptarët e Maqedonisë përfundimisht i kanë deligjitimuar dy partitë e deritanishme shqiptare dhe në këtë mënyrë u legjitimua opozita e njëmendtë shqiptare, që dje u mblodh rreth Këshillit Opozitar”, thuhej ndër të tjera në kumtesën e Këshillit Opozitar./tesheshi.com/
