Griezmann mes qëndrimit dhe largimit: e ardhmja në duart e presidentit të Atletikos

Emri i sulmuesit të Atletikos së Madridit dhe të përfaqësueses franceze ngjan se do të jetë nga më të lakuarit në sezonin e tramsferimeve gjatë kësaj vere.

Një zhvendosje nga kampionati spanjoll në atë anglez, nga Atletiko te Mançester Junajtedi, është ajo çka thuhet se do të ngjasë me Antoine Griezmann-in në javët në vazhdim.

Vetë lojtari e ka lënë të hapur mundësinë për një lëvizje teksa ka folur nga qendra e grumbullimit të përfaqësueses franceze.

“Agjentët e mi po bisedojnë me Atletikon; të shohim se çfarë do të ngjasë. E ardhmja ime do të vendoset këtë verë.”

Griezmann do të kalonte tre vite të shkuara nga Real Sociedadi te Atletiko e Madridit për të mbushur hapësirën e lënë bosh nga largimi i Diego Costa-s. Në sezonin e fundit ai shënoi 26 gola në 53 aktivizime për Atletikon në të tëra veprimtaritë.

Nëse do të ndodhte, largimi i sulmuesit francez nuk do të ishte ndonjë befasi e madhe, pasi dhe më herët Atletiko ka hequr dorë nga lojtarë të një kalibri të ngjashëm, si Costa, Falcao apo Aguero.

Për Griezmann-in, gjithçka është në dorë të presidentit të Atletikos, ndërkohë që ai është i lumtur tani për tani.

“Jam i lumtur këtu. Eshtë në duart e presidentit të klubit.” /tesheshi.com/