Ish-pjesëtari i përfaqësueses franceze, Frank Leboeuf, e ka kritikuar vendimin e UEFA-s për ta deklaruar patriotin e tij, Griezmann-in, si lojtarin më të mirë të Kampionatit Europian.
“E pëlqej shumë Griezmann-in, por ai nuk ishte lojtari më i mirë i turneut. Unë nuk pajtohem me këtë zgjedhje,” ka deklaruar Leboeuf.
“Duhet të jemi kritikë. Ne e pamë atë vetëm nga çerekfinalet e këtej. Ai pati dy mundësi në finale, por nuk i shfrytëzoi ato. Ndryshe, nuk pamë shumë prej tij.”
Leboeuf ka qenë pjesë e kombëtares franceze që fitoi Kupën e Botës në vitin 1998, e po ashtu Europianin e dy viteve më pas, në vitin 2000. Ai ka luajtur për Olimpikun e Marsejës, por për shumë vite ka qenë pjesë e skuadrës angleze të Çelsit.
Pepe, sipas tij, mund të ishte një prej lojtarëve që do ta meritonte këtë çmim.
“Pepe ishte në formë të jashtëzakonshme që nga fillimi e gjer në fund. Griezmann, në anën tjetër, u la në stol në ndeshjen e dytë,” ka thënë ai.
Griezmann pati rol të veçantë në arritjen e Francës në finalen e Europianit, duke shënuar ndaj Irlandës, Islandës dhe Gjermanisë, respektivisht në një të tetat, në çerekfinale dhe në gjysmëfinale. Por lojtari i Atletikos së Madridit nuk arriti t’i shndërronte në gol rastet e tij në finale. /tesheshi.com/
