Edhe një herë tjetër sulmuesi i Atletikos së Madridit u vjen në ndihmë “gjelave” me lojën e golat e tij, duke e kaluar Francën në çerekfinalet e Euro 2016-tës.
Francezët do ta kishin të vështirë ndaj irlandezëve në këtë mesditë të së dielës. Në Lion, ku mbështetja e tifozerisë vendase nuk ka munguar për asnjë çast, Irlanda do ta fillonte mjaft mirë në takimin e katërt të një të tetave.
Një pengim në zonë i sulmuesit irlandez Long që në çastet e para nga Paul Pogba, dhe gjyqtari italian Rizzoli është shtrënguar të japë 11-metërsh. Brady e ka kthyer në gol penalltinë, duke i dhënë kryesimin Irlandës në minutën e dytë.
Të gjendur befasisht në humbje, francezëve u duhet pak për ta marrë veten, për të mos ndaluar për asnjë çast më pas. Me rezultatin 0-1 për Irlandën nis pjesa e dytë, ku nuk ka të ndalur furia e frencezëve.
Dhe në skenë del sërish Griezmann, i njëjti njeri që e detyroi Shqipërinë të dorëzohej ditë më parë. Me të njëjtën skemë, me të njëjtin realizim, Griezmann barazon në minutën e 57-të. Një top i harkuar nga e djathta e sulmit, që gjen Griezmann-in e pambuluar në zonë, dhe goditja me kokë e tij është fatale. I njëjti lojtar e kalon Francën në epërsi katër minuta më pas. Francezët janë në delir, teksa kryesojnë 2-1.
Dalja me të kuqe e mbrojtësit Duffy ia vështirëson akoma më tepër punën Irlandës, që vetëm nga fundi i lojës arrin të rrezikojë. Griezmann në veçanti pati dhe një rast të pastër për ta thelluar rezultatin, e po ashtu dhe Gignac, që goditi dhe traversën.
Me mbylljen e 90 minutave, e me rezultatin 2-1, Franca kalon në çerekfinale, ku do të presë të takohet me fituesin e çiftit Angli – Islandë. /tesheshi.com/
