Griezman i është bashkuar zyrtarisht ditën e djeshme Barcelonës, duke i dhënë fund një prej transferimeve më të diskutuara të kësaj vere.
Barcelona ka paguar shumën e 120 milionë eurove, klauzolën e lirimit të sulmuesit francez, të depozituar në selinë e La Ligës, siç pohon shtypi sportiv spanjoll, dhe e quan lojtarin të vetin.
Griezman dhe klubi katalanas kanë gjetur gjuhën e përbashkët për një marrëveshje pesëvjeçare, tanimë me një klauzolë lirimi për francezin në shifrën 800 milionë euro!
Ai do të paraqitet si një lojtar i Barcelonës të dielën në mbrëmje, pasi të ketë kaluar testet mjekësore. Me nënshkrimin e kontratës do të zbresë në fushën e “Kamp Nout,” por jo në prani të tifozëve, që do të mungojnë për shkak të punimeve në ambientet e stadiumit. Një konferencë shtypi do të mbahet në orën 19:30, në një dalje të Griezmanit para gazetarëve.
Nëse në kampin e Barcelonës gjithçka duket në rregull, te Atletiko e Madridit e quajnë të pamjaftueshme shumën e paguar, dhe pretendojnë për 200 milionë euro, aq sa ka qenë klauzola e lirimit para 1 korrikut.
“Shuma e depozituar është e pamjaftueshme për të paguar klauzolën e tij të lirimit, sepse është e qartë se marrëveshja ishte bërë përpara se çmimi i tij të zbriste nga 200 në 120 milionë,” thotë deklarata e Atletikos së Madridit.
Klubi madrilen ka njoftuar nisjen e procedurave ligjore për t’i shkuar çështjes deri në fund, por kjo gjithsesi vështirë se mund ta ndryshojë fatin e Griezmanit, si një lojtar tanimë i Barcelonës. /tesheshi.com/
