Në një intervistë për TCH, deputetja demokrate Grida Duma tha se ndërkombëtarët duhen dëgjuar, porse sipas saj, opozita u detyrua nga mazhoranca që ta ndërmerrte aktin ekstrem të dorëzimit të mandateve
“Demokracia funksionale në Shqipëri është nisur dhe do të vijojë të ndërtohet veçse me ndihmën e ndërkombëtarëve. Unë mendoj se fjala e tyre duhet të dëgjohet me shumë vëmendje. Politika është art i të ecurit në bashkërendim, ku secili duhet të bëjë rolin e vet. PD-ja vendosi që të marrë këtë akt ekstrem, të menduar gjatë, por që ishte i kushtëzuar në raport me krizën e thellë në të cilën ndodhet vendi. Në themel të këtij akti ishte misioni i Partisë Demokratike për të treguar që institucione nuk ka. Nëse do të kishte, nuk do të zgjidhnim këtë rrugë”, tha znj. Duma.
Ndër arsyet më konkrete që ajo përmendi për të ilustruar atë që opozita e konsideron “rënie të institucioneve”, është pikërisht dosja e përgjimeve me kryebashkiakun Dako.
“Radha e veprimeve e ka tejkaluar dialogun. Pas bojkotit të parë për dekriminalizimin, marrëdhënies së kushtëzuar me Parlamentin, erdhëm në një situatë ku del kryebashkiaku e thotë se nuk ka gjë se ha drekë me kriminelët. Janë qëndrime që nuk ka lidhje më logjikën e të ulurit në dialog. Unë mendoj që edhe ky dialog është, pasi nuk i kemi djegur mandatet duke thënë që nuk duam gjë. Duam qeveri tranzitore, pa Edi Ramën kryeministër, që të tregojë se ka vullnetin për të vazhduar përpara reformën zgjedhore dhe atë në drejtësi”, shtoi deputetja demokrate. /tesheshi.com/
