Nga Mensur Krasniqi
Të dënuarit në burgun e Shtipit dhe Idrizovës nw Maqedoni, dje dhe sot nuk kanë pranuar të hanë drekën dhe darkën pasi që më herët, një numër i madh prej tyre kanë nënshkruar se do të fillojnë me grevë urie në këto dy burgje.
Ky zhvillim i ngjarjeve vjen pas dorëzimit të propozim-iniciativës për ndryshime në ligjin për amnisti, hartuar nga një grup individwsh me përkrahje të familjarëve të personave të dënuar.
“Propozimi është miratimi i ligjit për amnisti dhe për lirimin e 40 përqind nga dënimet e shqiptuara. Për shkak të kushteve ku qëndrojnë të burgosurit, erdhëm deri te kjo iniciativë. Të burgosurit e Shtipit sot dhanë nënshkrimin e tyre për grevë urie, para delegacionit evropian. Greva do të vazhdojë derisa nuk merret ndonjë përgjigje pozitive”, deklaroi Meri Nikollova, e cila propozoi ligjin.
Lajmin mbi grevën e të burgosurve e konfirmoi edhe drejtori i burgut të Idrizovës, duke thënë se po vëzhgon situatën, për të precizuar se për çka konkretisht po bëhet fjalë dhe se cili është halli i të burgosurve.
“Paralajmërim zyrtar me kërkesa në formë të shkrimit nga ana e të burgosurve deri në këtë moment nuk kemi marrë. Kemi infromata që një numër i vogël i të burgosurve kanë refuzuar drekën. Po e përcjellim situatën. Informatat tona thonë që ka mundësi të tilla që të protestohet me grevë urie nga ana e të burgosurve, në këtë formë duke përkrahur iniciativën qytetare për amnesti të të burgosurve”, tha Zhivko Pejkovski, drejtor i Idrizovës, burgut më të madh në Maqedoni.
Konfirmim të ngjashëm mbi grevën e të burgosurve ka ardhur edhe nga burgu i Shtipit. Sipas Drejtorisë për ekzekutimin e sanksioneve, vetëm 15 të burgosur kanë refuzuar ushqimin, ndërkaq që sipas informatave që posedon propozuesja e ligjit, Meri Nikollova, në këtë burg vetëm 3 persona kanë pranuar të hanë ushqimin dhe nuk i janë bashkangjitur grevës për shkaqe shëndetësore.
Familjarët presin që në afat prej 3 ditësh të marrin përgjigje nga kryetari i Kuvendit, Trajko Veljanoski, se a do të pranojë iniciativën për ndryshime të ligjit për amnesti ose jo.
Aktivistja Meri Nikollova, thotë për tesheshi.com që nëse kryetari i kuvendit Trajko Veljanoski mund që për një ditë të miratojë 300 ligje, pse mos të jenë 301 dhe ky i amnestisë së të burgosurve.
“Qytetarët kanë të drejtë që nëpërmjet referendumit të japin nënshkrimin dhe ta përmbajnë iniciativën për amnisti. Nëse nuk ka referendum, nuk do ketë vota në zgjedhje parlamentare. Numri është diku mbi 50 mijë, ashtu që politikanët le t’ja mendojnë mirë se çfarë po bëjnë”, kërcënoi Nikollova.
Është paralajmëruar që gjatë ditës së sotme grevës do t`i bashkangjiten edhe të burgosurit e qyteteve tjera, ndërsa në ditën e hënë, familjarët do të mblidhen në protestë të qetë, me çka paralajmërojnë edhe vendosjen e shatoreve para Kuvendit, ku do të qëndrojnë aty deri sa të marrin përgjigje pozitive. Nëse marrin përgjigje negative, të burgosurit kërcënohen me trazira brenda burgut. /tesheshi.com/
