Aktivistja e klimës Greta Thunberg ka argumentuar për vazhdimin e funksionimit të termocentraleve bërthamore, duke theksuar se energjia bërthamore është më e preferueshme se linjiti(qymyri).
“Personalisht, mendoj se është një ide e keqe të mbështetemi në linjit, ndërkohë që termocentralet bërthamore janë ende duke funksionuar. Duke qenë se ato tashmë janë duke punuar, mendoj se do të ishte gabim t’i mbyllim dhe të kalojmë në linjit,” tha zonja Thunberg, sipas një fragmenti para publikimit të një interviste që ajo i dha transmetuesit publik gjerman ARD, kanalit 1 që do të shfaqet nesër.
Deklarata e aktivistes së re suedez u kap menjëherë nga ministri i Drejtësisë Marco Bussmann, partia e të cilit (FDP) është në favor të mbajtjes në funksion të centraleve bërthamore – të cilat ishin planifikuar të mbylleshin përgjithmonë në fund të vitit.
“Edhe Greta Thunberg është në favor të funksionimit të termocentraleve bërthamore të Gjermanisë, një tjetër provë se kjo është gjëja e duhur për stabilitetin e rrjetit, uljen e çmimeve dhe neutralitetin e klimës,” shkroi Bussmann në llogarinë e tij në Twitter, duke synuar ministrin “e gjelbër” të Ekonomisë Robert Habeck, i cili këmbëngul se termocentralet bërthamore duhet të mbyllen.
Në të njëjtën intervistë, Greta Thunberg tregoi gjithashtu se ndërsa e kupton nevojën për të mbrojtur qytetarët nga çmimet e larta të energjisë, ajo beson se investimet në burimet fosile duhet të ndalen.
Adoleshentja suedeze theksoi gjithashtu se pasojat e krizës klimatike nuk duhen anashkaluar as në kohë lufte. “Çdo luftë është një fatkeqësi. Në shumë nivele. Por ne duhet të jemi në gjendje të përballemi me gjëra të ndryshme në të njëjtën kohë”, tha ajo. /tesheshi.com/
