Parlamenti grek miratoi projektligjin që formon policinë speciale në universitete, megjithë protestat e shumta të studentëve që e kundërshtojnë atë për një muaj, raporton AP.
Përfaqësuesit e mazhorancës qeverisëse votuan për projekt-ligjin me 166 vota pro e 132 kundër.
Sipas policisë, rreth një mijë tyë rinj protestuan para ndërtesës së parlamentit kundër ligjit, pasi e quajtën atë “anti-demokratik”.
“Nuk është policia ajo që hyn në universitete, por demokracia,” tha kryeministri Kyriakos Mitsotakis në një fjalim në parlament, duke shtuar se kjo ishte një mënyrë për “t’i dhënë fund dhunës dhe për të hapur rrugën për liri”.
Dje, rreth 5,000 njerëz protestuan në Athinë në reagimet më të mëdha në javët e fundit, në të cilat shpërthyen incidente të shumta. Policia përdori gaz lotsjellës dhe arrestoi 24 persona të akuzuar për përdorimin e eksplozivëve, sipas një burimi gjykate.
Tre oficerë policie u dërguan në spital, thanë autoritetet, ndërsa organizatorët thanë se katër prej protestuesve ishin të plagosur.
Ligjvënësit e opozitës kundërshtuan ligjin, duke thënë se ekzistenca e policisë në universitete ishte kundër parimit evropian të vetëqeverisjes.
Sipas ligjit të ri, një trupë policie prej një mijë personash me uniforma speciale dhe pa armë, por me shkopinj, do të patrullojë universitetet.
Prania e policisë në universitetet tradicionalisht liberale dhe shumë të politizuara ka qenë një temë e ndjeshme në Greqi që nga shtypja vdekjeprurëse e juntës ushtarake nga tanket kundër studentëve në nëntor 1973.
Universitetet aktualisht gëzojnë “azil” – imunitet të veçantë dhe asnjë autoritet shtetëror, polici apo edhe zjarrfikës, nuk mund të hyjë në kampuse dhe ndërtesa universitare përveç nëse ftohet zyrtarisht nga administrata e tyre. /tesheshi.com/
