Pas dhjetë vitesh “purgator financiar”, grekët më në fund e kaluan krizën e rëndë ekonomike dhe sociale…Greqia ka shënuar një rritje ekonomike mbi dy për qind për të dytin vit, megjithëse popullsia greke vazhdon të jetojë keq, sipas të dhënave zyrtare statistikore të Eurostat.
Vetëm bullgarët jetojnë më modestisht se grekët në BE, sepse fuqia blerëse e tyre mezi arrin 60 për qind të mesatares në Bashkimin Evropian, dhe sipas gjetjeve të fundit të zyrës së statistikave të BE-së, fuqia blerëse dhe produkti bruto për banor në Ballkani Perëndimor është edhe më i dobët – vetëm diku rreth 50 për qind e mesatares së BE-së.
Qytetarët më të pasur i ka Luksemburgu dhe Irlanda, 140 për qind dhe 112 për qind mbi mesataren e BE-së, të ndjekur nga holandezët, danezët dhe austriakët.
Francezët janë mu në mes, kurse prapa, përveç grekëve dhe bullgarëve, janë edhe lituanezët, sllovakët dhe kroatët.
Greqia u rikuperua nga kriza duke ulur kostot e mëdha të borxhit prej 360 miliardë euro për dhjetë vjet në kurriz të shpenzimeve publike, pagave dhe pensioneve, ndërkohë që inflacioni nuk ulet, veçanërisht çmimet e ushqimeve, benzinës dhe qirave janë të larta, kostoja e jetesës është ende e lartë.
Rimëkëmbja e ekonomisë greke u bë në kurrizin e popullit, thonë sindikatat e pakënaqura dhe ekonomistët e majtë, por qeveria e qendrës së djathtë e kryeministrit Kyriakos Mitsotakis tregon për rezultate të shkëlqyera ekonomike dhe parashikon se së shpejti inflacioni do të bjerë dhe standardi e jetesës do të fillojë të rritet.
Qytetarët janë ende të pakënaqur
“Greqia ka dhjetë vjet që po largohet nga BE-ja dhe në dekadën e ardhshme do të afrohet, sepse ka rifituar besimin e investitorëve”, thotë Alexis Patelis, këshilltari kryesor ekonomik i kryeministrit Mitsotakis.
Ai vë në dukje faktin se agjencitë botërore të vlerësimit hoqën shenjën e “kalbur” nga bonot e qeverisë greke, ndërsa britanikja The Economist e vlerësoi ekonominë greke si “më të avancuarën në 2023″.
Por sa kohë do të duhet të presë popullata greke që kjo “mrekulli ekonomike” të jetë e dobishme për masat, jo vetëm për aksionerët, bizneset, bankat dhe investitorët e huaj?
Grekët ende kujtojnë se para krizës financiare evropiane dhe botërore në 2008, ata jetonin mjaft mirë, pasi prodhimi i brendshëm bruto për banor i Greqisë para kësaj ishte 95 për qind e mesatares në BE.
Gjithsesi, diçka duket se ka nisur, sepse këtë vit qeveria e rriti pagën minimale të garantuar nga 780 euro bruto në 830 euro, megjithëse sindikatat tregojnë se paga vjetore në Greqi është ende 25 për qind nën mesataren e BE-së dhe se pensionet janë reduktuar.
Popullsia ende vuan nga kostoja e lartë e jetesës dhe sipas të dhënave të Bankës Qendrore të Greqisë, 27 për qind e grekëve ende jetojnë në kufirin e varfërisë. /tesheshi.com/
