Në një lëvizje surprizë, Kryeministri grek Aleksis Tsipras njoftoi se qeveria e tij synon të mbajë një referendum nëse Greqia duhet të pranojë propozimet e paraqitura nga huadhënësit.
Tsipras e ka shprehur qartë se ai kundërshton të pranojë termat e ofruar nga kreditorët, por tha se do të pranonte rezultatin e votimit të popullit në referendum.
Ai ka bërë me dije se të Shtunën do të kërkojë aprovimin e deputetëve në Parlament, që referendumi të mbahet të dielën, më 5 korrik.
“Pas 5 muajsh negociatash, partnerët tanë, fatkeqësisht, përfunduan duke drejtuar një propozim-ultimatum mbi popullin grek”,- tha Tsipras. Ai i bëri thirrje popullit të vendosë vetë në lidhje me kushtet e kreditorëve, nëse duan ti pranojnë apo jo ato.
Në 5 korrik grekët do t’i përgjigjen pyetjes për pranimin ose jo të masave shtrënguese të kërkuara nga kreditorët e huaj. Lidhur me këtë vendim është njoftuar edhe kancelarja gjermane Merkel, presidenti francez Holande si dhe krerët e BE-së. Kur Merkel u njoftua nga Tsipras mësohet të jetë përgjigjur: Pra grekët do të votojnë nëse duan të qëndrojnë ose jo në euro”.
Kryeministri grek Alexis Tsipras foli me shefin e Bankës Qendrore Europiane, Mario Draghi, i cili tregoi ‘mirëkuptim dhe ndjeshmëri’ në lidhje me vendimin e referendumit të datës 5 korrik. /tesheshi.com/
