Greqia i ka dërguar letra NATO-s dhe Kombeve të Bashkuara, në të cilat kundërshton deklaratat, siç i quan “inflamatore” të presidentit turk Rexhep Tajip Erdogan dhe u kërkon atyre të dënojnë sjelljen e Ankarasë, thanë të mërkurën burime diplomatike.
Dy aleatët e NATO-s, por armiq historikë, kanë qenë në konflikt për dekada për një sërë çështjesh – nga fluturimet mbi detin Egje deri te Qiproja e ndarë, raporton Reuters.
Bashkimi Evropian shprehu të hënën shqetësim për deklaratat e Erdoganit, i cili akuzoi Greqinë për pushtimin e ishujve të çmilitarizuar në detin Egje dhe tha se Turqia ishte e gatshme të “bëjë atë që është e nevojshme” kur të vijë koha.
Sipas agjencisë shtetërore të lajmeve Anadolu të Turqisë, Ankaraja i dërgoi letra BE-së, NATO-s dhe OKB-së këtë javë duke shpjeguar qëndrimet e saj për çështje të ndryshme, duke përfshirë pretendimet e të dy vendeve për hapësirën ajrore, ujërat territoriale dhe statusin e çmilitarizuar të ishujve të Egjeut.
Burime diplomatike greke të mërkurën theksuan se letra e Turqisë nuk korrespondon me realitetin, se argumentet e deklaruara janë të pabaza dhe shkelin të drejtën ndërkombëtare.
Athina u dërgoi gjithashtu letra OKB-së dhe NATO-s.
“Pozicioni i Turqisë është një faktor destabilizues për unitetin dhe kohezionin e Aleancës, i cili dobëson krahun jugor të aleancës ushtarake në një kohë krize”, tha ministri i Jashtëm grek Nikos Dendias në një letër drejtuar Sekretarit të Përgjithshëm të NATO-s, Jens Stoltenberg. /tesheshi.com/
