Ka reaguar Ministria e Jashtme ndaj letrës refuzuese të Presidentit Meta, lidhur me dhënien e plotfuqishmërisë për negociata me Greqinë për Paktin e ri Detar.
Gjuha e dikasterit të drejtuar nga Bushati ka qenë e kujdesshme, ki vihen re dy fjalë që rimojnë me “qetësinë dhe dashurinë” e Metës kur ish-kreu i LSI-së drejtonte parlamentin në aleancë me Ramën: qetësi e maturi.
“Ministria për Evropën dhe Punët e Jashtme po shqyrton letrën e Presidentit të Republikës, në përgjigje të kërkesës së dërguar prej saj, për lëshimin e autorizimit për fillimin e negociatave me palën greke për delimitimin e hapësirave detare mes dy vendeve.
Çështjeve të ngritura nga Presidenti i Republikës, Ministria për Evropën dhe Punët e Jashtme do t’u përgjigjet në rrugë institucionale. Sikundër Ministri për Evropën dhe Punët e Jashtme është i angazhuar për të vijuar bisedimet e konsultimet e nisura me Presidentin e Republikës për të gjitha çështjet me interes për këtë proces.
Procesi i nisur me Greqinë është kompleks, ndaj kërkon qetësi, maturi, institucionalizëm dhe jo projektimin e një anormaliteti që nuk ekziston”, thuhet në deklaratën e Ministrisë së Jashtme. /tesheshi.com/
