Maria 24-vjeçare u gjet në sallat e gjyqit të Volosit, me babanë e saj përballë, nën akuzë për rrahje të dhunshme, pasi kaloi në Islam.
Siç tha ajo për median greke, babai i saj nuk e gëlltitur dot faktin që e bija të konvertohet, duke reaguar tejet dhunshëm, gjë që e çoi në gjyq.
“Kur njoftova familjen se jam bërë muslimane, atëherë nisi sherri. Babai im as që donte të dëgjonte për Islamin dhe të më shihte me shami. Unë jetoj jashtë vendit, por u ktheva për të parë prindërit e mi. Përfunduam në gjykatë, por kjo nuk do të thotë se nuk e dua babanë tim. Më kërkoi të hiqja shaminë sepse do të vinte një prift në shtëpinë tonë dhe ngaqë nuk pranova, ai filloi të më godiste në kokë. Nuk dua t’i turpëroj prindërit e mi, i dua pasi e di që edhe ata më duan mua”, tha Maria 24-vjeçare, rasti i së cilës ka qenë ndër lajmet kryesore këto ditë në mediat greke.
Vajza, e cila tani punon në një laborator kërkimor mjekësor në një universitet në Britaninë e Madhe, ku studioi për biomjekësi, bëri një ankesë kundër babait të saj për rrahje. “Më rrahu kafshërisht për 20 minuta sepse nuk donte që unë të mbaja shami”, dëshmoi ajo në gjykatë ndërsa babai i saj qante dhe kërkonte falje. Prokurorja e rastit, duke mbrojtur fillimisht të drejtën e vetëkuptueshme të çdo personi për të zgjedhur besimin që pëlqen, kërkoi tre vjet burg burrin e dhunshëm.
“Pozicioni im është i vështirë sepse ai është babai im, por kjo ka të bëjë me etikën time(mbajtja e shamisë)”.
24-vjeçarja beson se babai i saj është penduar sinqerisht për veprimet e tij dhe se tani e tutje do të gjendet një mënyrë që ata të kenë harmoni me njëri-tjetrin: “Ai është penduar shumë, të gjithë bëjmë gabime, por është mirë të përballemi me veprimet tona”, tha ajo.
“Sa i përket dhunës, ajo që dua të them është se turp është të mos raportojmë diçka që cenon të drejtat tona, është t’i lëmë njerëzit të abuzojnë me të drejtat tona. Sekularizmi është i sanksionuar me kushtetutë, por ndryshon shumë nga ligji në praktikë. Këtë e ndjeva në kur erdha në Volos, nga shprehje bashkëqytetarësh ndaj meje lidhur me besimin tim”, nënvizoi Maria. /tesheshi.com/
